Сустрэча з насельніцтвам, што прайшла ў вёсцы Мышанка, была прысвечана тэме сацыяльна-эканамічнага стану рэгіёна і перспектыў яго развіцця. Гэта інфармацыя была даведзена жыхарам вёскі на сустрэчы са старшынёй раённага Савета дэпутатаў Сяргеем Макарэвічам.
Сяргей Макарэвіч падрабязна спыніўся на задачах, якія плануецца рэалізаваць у 2022 годзе, сярод якіх – пытанні прамысловасці і рознічнага тавараабароту.
– За студзень-люты 2022 года індэкс росту прамысловай прадукцыі па Петрыкаўскім раёне склаў 411,4 працэнта пры заданні 130 працэнтаў. Забеспячэнне паказчыка на такім высокім узроўні звязана з ростам больш як у 20 разоў аб’ёмаў здабычы хларыду калію Петрыкаўскім ГАКам ААТ “Беларуськалій”. Аб’ёмы вытворчасці прамысловай прадукцыі астатніх прадпрыемстваў, якія фарміруюць паказчык па Петрыкаўскім раёне, таксама перавышаюць узровень мінулага года. Так, Петрыкаўскім райжылкамгасам – 100% па секцыі D (забеспячэнне энергарэсурсамі) і 110,1% па секцыі Е (водаспажыванне, водаадвядзенне), Петрыкаўскі лясгас – 116%, ЭЛОХ “Ляскавічы” – 104,6%.
Аб’ём рознічнага таваразвароту па раёне за студзень-люты бягучага года склаў 15,7 мильёна рублей, або 100,4 працэнта ў супастаўных цэнах да студзеня-лютага 2021 года пры прагнозным заданні 100,4 працэнта. Дарэчы, у бягучым годзе накіравана 33 лісты арганізацыям гандлю з прапановай адкрыцця аб’ектаў на тэрыторыі раёна – Калінкавіцкага мэблевага камбінату, Брэсцкага панчошнага камбінату, Белвеста, Элемы, Марка, 8-га сакавіка, Электрасілы. Адкрыццё гэтых аб’ектаў дазволіла не толькі задаволіць попыт насельніцтва, а і захаваць фінансавыя сродкі ў раёне.
Акрамя гэтага, улада падтрымлівае прадпрыемствы прыватнай формы ўласнасці. У мінулым годзе ў аграгарадку Грабаў сталовая, якая не выкарыстоўвалася, перададзена ПП “ЮніСанПлюс”. Зараз прадпрыемства праводзіць у памяшканні касметычны рамонт і хутка яно стане аб’ектам гандлю.
Далей слова ўзяла старшыня сельскага Савета Ірына Баяшэнка і пазначыла тыя мерапрыемствы, якія былі праведзены ў сельскім Савеце па добраўпарадкаванні населеных пунктаў у 2021 годзе, і якія будуць рэалізаваны ў бягучым годзе. Старшыня райсавета пазначыў, што неабходна актывізаваць работу з пустуючымі дамамі. Так, пад пільнай увагай застаецца вёска Беседкі, бо менавіта гэты населены пункт мае дамы, у якіх ніхто не пражывае.
– Тут патрэбна правесці вялікую работу. Пустуючыя дамы парушаюць не толькі эстэтычны выгляд, а і з’яўляюцца аб’ектамі небяспекі, – канстатаваў прадстаўнік улады.
Адно з пытанняў ад насельніцтва тычылася якасці дарог. У тым ліку дарогі ў весцы Мышанка. Галоўны інжынер КВУП “Петрыкаўскі райжылкамгас” Юрый Кузняцоў, які прысутнічаў на сустрэчы, паведаміў: зараз вядзецца праца са спонсарамі для фінансавання правядзення рамонтных работ дадзенага ўчастка.
Сяргей Аляксандравіч у канцы сустрэчы дадаў, што яму прыемна чарговы раз сустрэцца з жыхарамі Мышанкі і паразмаўляць пра на-дзённыя пытанні. Зносіны праходзілі ў фармаце пытанняў і адказаў, атрымаўся канструктыўны дыялог пра жыццёвыя праблемы людзей.
– Усё, што патрэбна, улада для насельніцтва робіць. Пажадана, каб і людзі бераглі тое, што для іх ствараюць, – працягнуў дэпутат, маючы на ўвазе пабудаваную дзіцячую гульнявую пляцоўку, якую Мышанскі сельсавет набыў на атрыманыя за перамогу ў конкурсе сярод гарадскіх пасялковых, сельскіх Саветаў дэпутатаў грамадскага самакіравання Гомельскай вобласці сродкі.
Агучаныя на сустрэчы прапановы і просьбы насельніцтва ўзяты на кантроль.
Наталля ЧАРНЯЎСКАЯ.
Фота аўтара.
Оставить комментарий