Выдатны старт новай спартыўнай дысцыпліны на Петрыкаўшчыне

У нядзелю, 6 жніўня, на першым гарадскім пляжы адбыўся першы турнір па пляжным валейболе.

У першую чаргу трэба адзначыць якасныя змены, што адбыліся на месцы адпачынку гараджан і гасцей горада. Плошча пляжа значна ўзбуйнела як у даўжыню, так і ў шырыню: узбярэжжа дадало за кошт намытага пяску таму месца цяпер для адпачываючых з’явілася значна болей. Тут жа з’явіліся шэзлонгі, а аматары актыўнага адпачынку атрымалі пляцоўку для пляжнага валейбола. Вядома, гэта і дазволіла правесці спаборніцтвы па адзначанай дысцыпліне.

На турнір заявілася 6 каманд, што складаліся з мужчыны і жанчыны: працоўныя калектывы прадстаўлялі дружыны ЦРБ, Петрыкаўскага рудаўпраўлення, ПМС. Акрамя гэтага да змагання за кубак далучыліся і аматарскія ініцыятывы неабыякавых землякоў: калектывы “Dream Team”, “Перамога” і “Ткачэнка +1”.

Каманды былі падзеленыя на дзве групы па тры калетывы ў кожнай. Пасля гульняў, што праходзілі па кругавой сістэме былі вылучаныя лепшыя дружыны, што і змагаліся за прызавыя месцы.

Дададзім, што вопыт спартсмены атрымалі годны: удзельнікі адзначалі, што нягледзячы на блізкасць пляжнага валейболу да валейболу класічнага, усё ж гуляць з адным партнёрам на пяску і ўлічваць напрамак і сілу ветру – патрабуе пэўнага спрыту і навыкаў.

У першым паўфінале сышліся каманды “Ткачэнка +1” і “ЦРБ”. Медыкі не вытрымалі пад націскам апанентаў і пацярпелі паражэнне з лікам 0:2 з спадзяваннем на наступную гульню і трэцяе месца.

У другім паўфінале матч праходзіў больш напружана, але валейбалісты “Перамогі” аказаліся мацнейшымі за апанентаў з рудаўпраўлення.

У выніку прызавыя месцы былі размеркаваныя наступным чынам: трэцяя прыступка п’едэстала скарылася камандзе ЦРБ, другой была дружына “Перамога”, а чэмпіёнства ў турніры святкавалі Ірына і Андрэй Ткачэнкі.

Ёсць упэўненасць, што гэтыя летнія спаборніцтвы стануць традыцыйнымі. Здаецца няма перашкод і для таго, каб турнір стаў адкрытым і гасцінную Петрыкаўшыну наведвалі б спартсмены з суседніх рэгіёнаў, ну а пакуль мы канстатуем выдатны старт сапраўднага валейбольнага свята!

Арцём ГУСЕЎ.
Фота аўтара.