На Петрыкаўшчыне адбылася знамянальная падзея: вадзіцель на адвозцы збожжа сельскагаспадарчага прадпрыемства СУП “Палессе-Аграінвест” Сяргей Томаль першым у раёне адвёз 1000 тон збожжа на айчынным аўтамабілі МАЗ-551605.
Ва ўрачыстай абстаноўцы кіраўнік раёна Аляксандр Кохан уручыў герою жніва ліст падзякі ад раённага выканаўчага камітэта, прэмію, кветкі і падарунак.
Аляксандр Васільевіч павіншаваў вадзіцеля з такой ганаровай узнагародай, падзякаваў за самаадданую нялёгкую працу і выказаў надзею, што тысячнікаў у раёне будзе больш.
“Моцнага здароўя, поспехаў, дабрабыту, каб і на кукурузе перавезлі не адну тысячу тон. Стаўка сёлета зроблена менавіта на гэтую культуру”, – сказаў старшыня райвыканкама.
Павіншаваў тысячніка і дырэктар СУП “Палессе-Аграінвест” Аляксандр Верамееў, уручыўшы вадзіцелю ліст падзякі і каштоўны падарунак.
Сяргей Мікалаевіч родам з Петрыкава. Пасля заканчэння сярэдняй школы пайшоў служыць у армію, а затым вярнуўся на радзіму працаваць у мясцовым аграпрадпрыемстве СУП “Палессе-Аграінвест”. З таго часу свайму выбару не змяніў.
Працоўны стаж нашага героя складае 16 гадоў. Дарэчы, Сяргей Мікалаевіч не ўпершыню святкуе аграрную перамогу, некалькі гадоў таму ён ужо станавіўся першым тысячнікам у раёне.
Работнік сціпла зазначыў, што не чакаў ад сябе такога выніку, проста ўключыўся ў працу і рабіў яе з усёй адданасцю. Мужчына, між іншым, яшчэ шматдзетны бацька. Разам з жонкай гадуюць трох дзяцей. Старэйшы сын зараз вучыцца ў медыцынскім універсітэце, сярэдняя дачка пойдзе ў пяты клас, а самаму малодшаму сыну яшчэ толькі паўтара годзіка.
Сказаць, што працаўнікам не пашанцавала з надвор’ем, гэта нічога не сказаць. Дажджы, што на гэтым тыдні прайшлі ў раёне, ды і ўвогуле па вобласці, крыху запаволілі тэмпы ўборкі.
“Мы трымаем руку на пульсе. Кантралюем кожную хвіліну, каб, пакуль ёсць надвор’е, працаваць ва ўсю моц”, – сказаў у інтэрв’ю герой жніва.
Наталля ПЕТРУШЭНКА.
Фота Арцёма ГУСЕВА.
Оставить комментарий