Працягам двух дзён, 13 і 14 лютага Петрыкаўшчына прымала абласныя спаборніцтвы па валейболе сярод навучэнцаў 2009 года наражэння і малодшых зборных раёнаў другой групы.
Апрача нашых юных валейбалістаў, у турніры ўзялі ўдзел зборныя юнакоў і дзяўчат з Гомельскага, Добрушскага, Жыткавіцкага, Лельчыцкага і Хойніцкага раёнаў. Каманды былі падзеленыя на дзе групы па тры дружыны ў кожнай, дзе мацнейшыя калектывы выяўляліся ў гульнях па кругавой сістэме. Пасля пераможцы груп сыходзіліся ў валейбольнай сустрэчы за першае месца, а зборныя, што занялі ў групах другое месца, змагаліся за трэцюю прыступку п’едэсталу.
Дзяўчынкі выступалі ў спартыўнай зале гімназіі. Зборная Петрыкаўшчыны, якую прадстаўлялі навучэнкі Конкавіцкай, Чалюшчавіцкай сярэдніх школ і гімназісткі, трапіла ў групу разам з дружынамі Хойніцкага і Гомельскага раёнаў. І калі з хайнічанкамі нашыя зямлячкі разабраліся з лікам 2:0, то вось гамяльчанак перамагчы не ўдалося і пасля паражэння 0:2 петрыкаўскія дзяўчыны занялі другое групавое месца. Наперадзе была гульня з камандай Жыткавіцкага раёна, якая таксама заняла ў суседняй падгрупе другое месца.
Здавалася, што жыткаўчанкі лепей падрыхтаваныя тэхнічна, але шэраг памылак саперніц, падтрымка і больш акуратная гульня дазволіла нашым зямлячкам урэшце перамагчы 2:1 і забяспечыць сабе трэцяе месца ў турніры.
Хлопцы ж спаборнічалі ў спартыўнай зале ДЮСШ і другой гарадской школе. Нашыя валейбалісты аказаліся ў адной групе разам з суседзямі з Жыткавіцкага і Лельчыцкага раёнаў. Землякам не спатрэбілася больш за чатыры партыі, каб апынуцца на першым радку групавой турнірнай табліцы. У другой групе перамогу святкавалі юнакі з Гомельскага раёна.
Зборная Петрыкаўшчыны, спартыўны гонар якой баранілі навучэнцы Конкавіцкай, Лучыцкай і першай гарадской школ, ішла з гамяльчанамі роўна. Але напрыканцы першай партыі нашым рабятам удалося адыграць патрэбныя ачкі. Не менш напружана праходзіла і другая партыя. Гаспадары здолелі забяспечыць сабе неблагі адрыў у шэсць ачкоў, справа дайшла да кантрольнага мяча. Але хваляванне не дазволіла дацягнуць матч да перамогі. Сапернікі дагналі і, урэшце, абыгралі нашых землякоў, перавёўшы вызначэнне пераможцаў да трэцяй, кароткай партыі.
І тут сілы былі роўныя да апошняга моманту. На жаль, не хапіла нашым валейбалістам крыху сабранасці, каб завяршыць сустрэчу на сваю карысць — 14:16 і гамяльчане святкавалі перамогу. Петрыкаўская зборная заняла другое месца, а на трэцюю прыступку п’едэстала ўзняліся суседзі ў Лельчыцкага раёна.
Арцём ГУСЕЎ.
Фота аўтара.
Оставить комментарий