Тэма ўборачнай востра стаіць на парадку дня ў Прэзідэнта Беларусі Аляксандра Лукашэнкі і ўсіх тых, хто працуе на палях. Прыбраць якасна і ў тэрмін збожжа, нарыхтаваць кармы на зімовы перыяд і падрыхтаваць глебу да наступнага сезону – задачы з самых галоўных. Наш карэспандэнт адправіўся на палеткі ААТ “Чалюшчавічы”, дзе аграрыі шчыра працуюць на карысць агульнага “каравая” краіны.
Як распавёў дырэктар ААТ “Чалюшчавічы” Сяргей Ракіцкі, работа ў гаспадарцы літаральна кіпіць, інакш не скажаш.
“Нам крыху не пашанцавала з надвор’ем у вясновы перыяд. Дажджоў не было ні ў маі, ні ў чэрвені. А калі пайшоў дождж, ра-зам з ім і пайшло расці пустазелле, што не на карысць збожжу – агучыў Сяргей Мікалаевіч. – Нават не гледзячы на гэта, мы прыклалі ўсе намаганні, каб зберагчы ўраджай”.
Неаднаразова Кіраўнік дзяржавы параўноўваў збожжа з золатам, нагадваючы пра нарастаючаую ў свеце праблему вакол харчовага крызісу і ўпэўненай пазіцыі нашай краіны ў сувязі з гэтым: нам баяцца няма чаго, галадаць дакладна не будзем. Забеспячэнне харчовай бяспекі на цвёрдым кантролі год ад года.
Пакуль дырэктар праглядаў, як працуюць яго падначаленыя на палях, мы прыпыніліся на зернетаку. У гаспадарцы ячменныя палі ўжо прыбраны, а рапсавыя паступова пусцеюць, закрамы запаўняюцца, але першы ды важны этап – сушка збожжа.
На КЗСВ-30, што працуе ў аграгарадку Чалюшчавічы, з першага дня жніва працуе ў бесперапынным рэжыме. Не паспявае з пляцоўкі знікаць гара зерняў жыта, як неадкладна вырастае другая.
Працоўны стаж Міхаіла Козінца, які шчыруе на сушцы збожжа, сёлета складзе 45 гадоў. Мужчына шмат дзе сябе паспрабаваў, але знайшоў свой шлях у сельскай гаспадарцы.
“Цяпер з палёў сюды возяць жыта. За дзень у сярэднім паступае 80 тон. Але пры добрым надвор’і могуць даставіць і ўсе 120, – увёў у курс справы Міхаіл Іванавіч. – Сыры ўраджай праходзіць поўны тэхналагічны цыкл і выходзіць ужо сухім. Аптымальна, калі вільгацямер пакажа не менш за 14 %. За суткі ўдаецца прасушыць каля 25 тон зерня”.
Збожжа ў час збору мае выгляд неаднароднай зерневай масы, у якую ўваходзяць розныя прымешкі арганічнага і мінеральнага паходжання. Асабліва непажаданымі з’яўляюцца лісце і сцеблы пустазелля, якія, як правіла, маюць падвышаную вільготнасць. Таму такое сабранае зерне няўстойлівае пры захоўванні: праз суткі-двое ў ім могуць пачацца працэсы гідролізу, што прыводзіць да пагаршэння якасці і страт ураджаю.
Самым няўстойлівым з’яўляецца збожжа, сабранае прамым камбайнаваннем. Таму сабранае зерне трэба неадкладна накіроўваць на апрацоўку, пажадана ў патоку з уборкай.
Тэму ўборачнай зноў працягнуў Сяргей Ракіцкі, абазначыўшы, што зараз у гаспадарцы працуюць некалькі экіпажаў.
“Азімы ячмень мы прыбралі даўно, зараз прыбіраем жыта і трыцікале. Адначасова вядзём нарыхтоўку кармоў (сянаж травяністы) пад пасеў рапсу. З 5 жніўня пачнём сеяць рапс. Таксама ў нас на падкорме кукурузы заняты спецыяліст. Леанід Мазай працуе ў нас не першы сезон, зарэкамендаваў сябе з лепшага боку, таму ў якасці хімічнай праполкі зерневых і кукурузы я не сумняваюся. Цяпер гэта ўжо трэці падкорм за сезон вадкімі ўгнаеннямі”, – сказаў Сяргей Мікалаевіч.
Наталля ПЕТРУШЭНКА.
Фота аўтара.
Оставить комментарий