З 31 сакавіка па 2 красавіка ў Нацыянальным выставачным цэнтры “БЕЛЭКСПА” праходзіла Міжнародная вясновая выстава-кірмаш турыстычных паслуг “АДПАЧЫНАК-2022”.
– “АДПАЧЫНАК-2022” – самая буйная турыстычная выстава Беларусі ў катэгорыі “Турызм і адпачынак”, – падзялілася з намі старшы інспектар сектара спорту і турызму Петрыкаўскага райвыканкама Алена Буракевіч, якая прэзентавала ў Мінску новыя турысцка-экскурсійныя маршруты Петрыкаўшчыны. – Гэта міжнародная дзелавая прастора для краін, рэгіёнаў і турыстычных кампаній з усяго свету, якія прадстаўляюць свае прадукты і паслугі на беларускім рынку.
Удзельнікі і наведвальнікі выставы мелі магчымасць сустрэцца з прадстаўнікамі сусветных турыстычных асацыяцый, рэгулятарамі галіны, знайсці новых кліентаў і партнёраў, а таксама даведацца аб трэндах індустрыі на ўнікальных мерапрыемствах дзелавой праграмы. Гэта, насамрэч, ідэальная бізнес-пляцоўка для рэкламы турыстычных маршрутаў, новых тураў, сустрэч са старымі партнёрамі, наладжванні новых дзелавых кантактаў.
Як расказала Алена Буракевіч, выстава стала знакавай падзеяй як для людзей, якія любяць і ўмеюць адпачываць, так і для прафесіяналаў, хто працягвае працаваць у гэтай сферы.
– Асноўную стаўку мы робім на свой унутраны турызм, – канстатавала Алена. – Дадзеную тэндэнцыю, пэўна, улавілі і радавыя наведвальнікі. Уздыхнуўшы па “заморскіх берагах”, яны самым актыўным чынам пачалі цікавіцца маршрутамі сваёй краіны. У Беларусі ёсць сотні месцаў, дзе можна добра правесці час. Зрэшты, пры любым раскладзе сёлетні турыстычны сезон абяцае быць куды больш паспяховым, чым ён выдаўся летась.
Наталля ЧАРНЯЎСКАЯ.
Оставить комментарий