Стартавала традыцыйная кампанія па прыёмцы да новага навучальнага года ўстаноў адукацыі. Шматлікая дэлегацыя з прадстаўнікоў розных ведамстваў і структур старанна абследуе кожны аб’ект, каб вынесці агульны вердыкт.
Прыёмка школ і дзіцячых садоў стартавала з пачатку жніўня на Петрыкаўшчыне. На што найперш звяртае ўвагу камісія, даведаўся наш карэспандэнт, прыняўшы ўдзел у аб’ездзе ДУА “Дашкольны цэнтр развіцця дзіцяці”.
Для ўстаноў адукацыі Петрыкаўскага раёна летняя пара – гэта час, калі ўсе актыўна рыхтуюцца да новага навучальнага сезона. Пафарбаваць плот, сцены, падлогі, нешта падклеіць, а нешта пабудаваць нанова. Пакуль дзятва актыўна праводзіла час у двары Цэнтра, правяраючыя вывучалі дакументацыю, стан будынкаў і памяшканняў, узровень арганізацыі працы і шмат іншага.
Гігіеністы ацэньвалі адпаведнасць нормам, супрацоўнікі профільнага ўпраўлення – агульны стан і гатоўнасць установы. Прадстаўнікі РАНС – пажарную бяспеку.
Як адзначыла намеснік старшыні райвыканкама Святлана Сянько, сертыфікат гатоўнасці падпісваецца не адразу, як правіла, даецца час на ўстараненне заўваг і прапаноў.
Па словах начальніка аддзела адукацыі Людмілы Жукавец, звычайна ў Петрыкаўскім раёне за дзень абследуюць каля 8 устаноў адукацыі. У раёне іх налічваецца 39.
“Мы ставімся да прыёмкі як да іспыту, – распавяла загадчыца дзяржаўнай установы адукацыі «Дашкольны цэнтр развіцця дзіцяці горада Петрыкава” Алена Панамарэнка. – Імкнемся распавесці камісіі, у які бок плануем развівацца. Гаворым пра свае праблемы, пра тое, дзе нам патрэбна дапамога і садзейнічанне, і атрымліваем падтрымку. Паколькі ў нас не маленькая тэрыторыя, падрыхтоўка да прыёмкі займае шмат часу і сіл. Радуе, што ў нас вельмі адказныя бацькі – заўсёды дапамагаюць. У некаторых кабінетах мы зрабілі касметычны рамонт: дзе-нідзе асвяжылі плітку, сцены, падрыхтавалі новыя цацкі”.
Касметычныя пераўтварэнні – гэта справа агульных рук. Дырэктары, педагогаў, тэхработнікаў, бацькоў.
Паводле слоў Алены Сяргееўны, у Цэнтры працуе 24 педагога, 24 – тэхнічнага персаналу. Цэнтр наведвае 124 дзіцяці. Сёлета прыйдуць два маладыя спецыялісты. Актыўныя, ініцыятыўныя, працавітыя.
У час прыёмкі дэлегацыя праверыла навучальныя, гульнявыя класы, спальныя пакоі, харчаблокі, абследавалі спартыўныя і гульнявыя пляцоўкі. Цягам тыдня ў раёне плануюць наведаць усе ўстановы адукацыі.
Наталля ПЕТРУШЭНКА.
Фота аўтара.
Оставить комментарий