Вечар пятніцы для жыхароў аграгарадка Курыцічы быў незвычайным – на полі перад населеным пунктам гаспадарка адзначала раённыя Зажынкі – народная свята пачатку жніва і збору ўраджаю.
Акрамя галоўных віноўнікаў урачыстасці – хлебаробаў, на мерапрыемстве прысутнічалі прадстаўнікі адміністрацыі раёна і кіраўнікі сельгасарганізацый Петрыкаўшчыны. Пасля музычнага вітання і творчага падарунку ад чалюшчавіцкіх артыстаў з прамовай перад прысутнымі выступіў старшыня райвыканкама Аляксандр Наўныка, які адзначыў:
– Сябры, вось і надыйшоў чарговы сезон жніва – часу, калі вы павінны даказаць, што наша зямля не менш урадлівая за іншыя, што і мы годныя гаспадары. Спадзяюся, ваша шчырая праца прынясе важкі ўнёсак да агульнага беларускага караваю.
Да слоў пажадання моцнага здароўя і ладнай працы далучыўся намеснік старшыні райвыканкама Мікалай Місюра. Ён распавёў пра апошнія дасягненні сельскагаспадарчай галіны раёна, адзначыўшы, што ўжо сёння 52 камбайны гатовыя выйсці на палеткі, яшчэ 5 новых машын прыбудуць на Петрыкаўшчыну днямі. У гарачы час жніва кожны экіпаж сажне зерневых у сярэднім на 350-ці гектарах палеткаў.
Пасля гэтых слоў жанчыны накіраваліся да поля, каб зжаць першы сноп, які быў падараваны кіраўніку раёна.
Протаіерэй і настаяцель царквы Ушэсця Гасподняга Дзмітрый Пасечнік адслужыў малебен і асвяціў прысутных і сельскагаспадарчую тэхніку.
Усім прысутным быў прапанаваны квас і, канешне, каравай, што атрымалі пачэсныя госці напачатку мерапрыемства. Слова было прадастаўлена выконваючаму абавязкі дырэктара ААТ “Курыцічы” Мікалаю Відасеву. Мужчына гучна прамовіў: “Камбайнеры, па машынах”.
Пасля чаго калона камбайнаў пачала ўпэўнена рухацца ў напрамку поля. Пажадаем хлебаробам здароўя, моцы, невычэрпнай энергіі і добрага надвор’я.
Арцём ГУСЕЎ, фота аўтара.
Оставить комментарий