Сёння наш матэрыял пра тых, чыя праца прыносіць цяпло і ўтульнасць у кожны наш дом і дзякуючы каму наш горад жыве і развіваецца
Жыллёва-камунальную гаспадарку можна смела назваць найважнейшай галіной жыццезабеспячэння людзей. Акрамя таго, што дзякуючы гэтай сферы гарадскія жыхары забяспечаны цяплом, вадой, газам, электраэнергіяй, гарадскім транспартам, камунальнае прадпрыемства займаецца і асвятленнем вуліц, азеляненнем, рамонтам дарог, уборкай і вывазам смецця.
Наш карэспандэнт сустрэўся з кіраўніком камунальнага прадпрыемства напярэдадні іх прафесійнага свята, з мэтай распавесці, якая вялікая праца была праведзена камунальнікамі для паляпшэння ўмоў жыцця і колькі працы ў яго ўклалі петрыкаўчане і жыхары раёна.
– Мінулы год быў часам напружанай працы, – распавёў у час інтэрв’ю дырэктар камунальнага вытворчага ўнітарнага прадпрыемства “Петрыкаўскі райжылкамгас” Сяргей Гайчук. – Наша прадпрыемства паспяхова справілася з даведзеным планам, было забяспечана аказанне насельніцтву і юрыдычным асобам жыллёва-камунальных паслуг неабходнай якасці і ў патрабаваных аб’ёмах.
Забяспечана бесперабойная і безаварыйная работа аб’ектаў цеплазабеспячэння, водазабеспячэння, водаадвядзення, жыллёвага фонду, падтрыманне ў належным стане вулічна-дарожнай сеткі і аб’ектаў добраўпарадкавання.
Прадпрыемства атрымала выручку ад рэалізацыі прадукцыі на суму 14.415.000 рублёў, што складае 124,4% да аналагічнага перыяду мінулага года, сабекошт рэалізаванай прадукцыі склаў 13.746.000 рублёў.
Выкананы даведзены паказчык па суадносінах тэмпу росту прадукцыйнасці працы па выручцы на 1 сярэднеспісачнага работніка і тэмпу росту намінальнай налічанай заработнай платы, выкананне склала 1,14, пры заданні не менш як 1,0.
Сярэднямесячная заработная плата за год па прадпрыемстве склала 863,9 рубля, што складае 110,8% да аналагічнага перыяду мінулага года.
Прадпрыемствам выканана заданне па зніжэнні страт цеплавой энергіі ў цеплавых сетках, пры сярэднеабласным паказчыку 8,0%, узровень страт склаў 6,8%. Зніжэнне страт і няўлічаных расходаў вады складае 11,4 працэнта, пры заданні 11,5 працэнта. У 2021 годзе заменена 2500 метраў сетак водазабеспячэння і 1300 метраў сетак водаадвядзення.
Істотны ўклад у паспяховую працу прадпрыемства ўносіць калектыў цеплавой гаспадаркі на ўсіх участках прадпрыемства – Петрыкаўскім, Капаткевіцкім, Мышанскім, Ляскавіцкім, Пціцкім. На прадпрыемстве эксплуатуецца 38 кацельняў, і 1 міні-ЦЭЦ, больш за 68 кіламетраў цеплавых сетак.
У 2021 годзе аб’ём вытворчасці цеплавой энергіі склаў амаль 71000 Гкал. Рэалізавана спажыўцам 66300 Гкал, што складае 124% да аналагічнага перыяду мінулага года. Выручка ад рэалізацыі склала 8442000 рублёў, прыбытак склаў 577000 рублёў, што дазваляе нам набыць матэрыялы і іншыя рэсурсы для выканання пастаўленых задач на чарговы год.
Варта адзначыць, што цеплавая гаспадарка з’яўляецца самай энергаёмістай і матэрыялаёмістай, тут працуе больш за палову ўсяго працоўнага калектыву – 266 чалавек. Асноўны працэнт прыбытку атрыманы ад аказанага гэтага віду дзейнасці. Удзельная вага выручкі па цеплазабеспячэнні ў агульным аб’ёме выручкі прадпрыемства складае 67,4%.
Я хачу падзякаваць усім за добрасумленную працу, і, галоўнае, усім вельмі патрэбную. Хочацца выказаць шчырыя словы падзякі калектыву за стабільную працу. Звярнуся і да жыхароў нашага горада: большасць з вас нават не ўяўляе сабе, якім коштам сёння ў вашыя дамы прыходзяць святло, вада, газ і цеплыня. Вельмі прашу ўсіх быць уважлівымі, своечасова аплочваць камунальныя паслугі, бо ад гэтага залежыць наш з вамі камфорт. Ваш дом – гэта не выключна сцены, гэта яшчэ пад’езд, вуліца, тратуар, месца працы. Беражыце сябе і шануйце чысціню!
- Аб’ём вытворчасці электрычнай энергіі ў 2021 годзе склаў амаль 3 мільёны кілават, рэалізавана РУП “Белэнерга” 1 854,1 тысяч кілават.
Даход ад рэалізацыі склаў 465,2 тысяч рублёў, атрыманы прыбытак у суме 212,5 тысячы рублёў.
Вытворчы працэс праходзіць пад кіраўніцтвам галоўнага інжынера Кузняцова Юрыя Мікалаевіча, галоўнага энергетыка Шкурганава Аляксея Уладзіміравіча, майстра міні-ЦЭЦ Луцэнкі Вячаслава і калектыву міні-ЦЭЦ.
- Сярод усіх жыллёва-камунальных паслуг, якія ўплываюць на здароўе чалавека і стан навакольнага асяроддзя, у найбольшай ступені аказвае ўплыў якасць водазабеспячэння і ачысткі стокавых вод.
Своечасовае абслугоўванне абсталявання, аператыўна прымаемыя меры па папярэджанні аварый дазваляюць бесперабойна і ў поўным аб’ёме забяспечваць вадой патрэбы насельніцтва горада і сельскай мясцовасці, якія растуць, – расказала майстар ВКП Ларыса ЖУДРО. – Хачу адзначыць нялёгкую, часам у экстрэмальных умовах, працу работнікаў гэтай гаспадаркі, якая патрабуе вытрымкі, пэўных навыкаў, аператыўнасці ў прыняцці рашэння і яго выканання.
- Транспартны ўчастак – галоўная артэрыя прадпрыемства
Дастаўка грузаў, своечасовае забеспячэнне падраздзяленняў транспартнымі сродкамі, забеспячэнне спраўнага стану, нармальнага зместу і захоўвання транспарту. Прадпрыемства мае 60 адзінак аўтамабіляў і 38 трактарнай тэхнікі рознага прызначэння, 36 адзінак прычэпаў і прычапнога абсталявання – усё гэта ляжыць на плячах работнікаў.
Тут выконваюцца работы па падрыхтоўцы вытворчасці, дрэваапрацоўцы, стварэнню сталярных вырабаў, рамонце абсталявання, аўтамабільнай, трактарнай і іншай тэхнікі, забяспечваецца патрэбнасць у перавозках, вядзецца нарыхтоўка мясцовых відаў паліва. Многія іншыя работы пад сілу гэтаму калектыву.
- Служба “115” як нумар выратавання. Толькі ў сферы ЖКГ
Калі адключылася святло, перагарэла лямпачка ў пад’ездзе, забіла каналізацыю або нехта залівае з суседзяў – тэлефанаваць трэба на адзіны нумар “115”. Служба працуе кругласутачна, – распавяла дыспетчар аварыйнай службы Наталля Шабалтас. – Вядзе працу ў нас чатыры спецыялісты. Практычна кожны з іх працуе па 12 гадзін. Два дні на працы, потым два дні адпачынку. Ёсць і начныя дзяжурствы, прадуманыя на выпадак экстраных сітуацый.
Зразумела, што наша праца не з лёгкіх. Нам проста неабходна трымаць сябе ў руках і аператыўна прымаць рашэнні. А нярвовая чаму? Ну, уявіце, тэлефануе чалавек, а яго кватэру з дарагім рамонтам залівае сусед зверху. Як тут быць спакойным? Чалавек у паніцы.
Нумар “115” сапраўды спрасціў працу работнікам ЖКГ, вырашэнне тэрміновых сітуацый грамадзян. Калі раней трэба было перабраць з дзясятак нумароў, каб вырашыць бытавую жыллёвую праблему, то зараз дастаткова аднаго званка. Адзіны нумар “115” дзейнічае таксама для ўсіх аператараў мабільнай сувязі.
Наталля ЧАРНЯЎСКАЯ.
Фота аўтара.
Оставить комментарий