На мінулым тыдні, напярэдадні прафесійнага свята, у зале раённага Дома культуры ўшаноўвалі работнікаў сферы бытавога абслугоўвання насельніцтва і ЖКГ.
Заслужаныя ўзнагароды – ганаровыя граматы і падзякі – атрымалі работнікі жыллёва-камунальнай сферы, якія праславіліся сваёй плённай працай і высокімі паказчыкамі.
З віншавальным словам выступіў дырэктар дзяржаўнага прадпрыемства “Петрыкаўскі райжылкамгас” Сяргей Гайчук.
Сяргей Мікалаевіч у сваім выступленні адзначыў станоўчыя бакі работы прадпрыемства, дынаміку развіцця, эканамічныя паказчыкі.
– Выбраная вамі справа патрабуе самааддачы, цярпення, і самае галоўнае – умення працаваць з людзьмі. Сваёй працай вы робіце ўклад у забеспячэнне бесперабойнай жыццядзейнасці горада і раёна. Ваша работа садзейнічае надзейнаму функцыянаванню кожнага прадпрыемства і ўстановы, камфортнага жыцця насельніцтва.
Шчырыя віншаванні з прафесійным святам выказаў і намеснік старшыні Петрыкаўскага раённага выканаўчага камітэта Аляксандр Дзягцяр:
– Ад прафесіяналізму, адказнасці, уважлівага стаўлення да справы кожнага камунальніка залежыць штодзённы камфорт беларусаў і гасцей краіны. Ваша карпатлівая праца мае велізарнае грамадскае значэнне. Прыгожыя, чыстыя, утульныя вуліцы нашых гарадоў і вёсак – вынік сталай стваральнай працы.
Аляксандр Фёдаравіч пажадаў віноўнікам свята поспехаў, натхнення, дасягненняў і здзяйсненняў намечанага.
Творчыя нумары гледачам падарылі артысты раённага Дома культуры, а таксама танцавальныя калектывы “Брадвей”, “Angelina”, “Экшэн”.
Оставить комментарий