Сёння, бліз станцыі Коржаўка, прайшоў агляд гатоўнасці пажарных каманд і брыгад Петрыкаўскага лясгасу.
Начальнік аховы, абароны лесу і паляўнічай гаспадаркі Гомельскага дзяржаўнага вытворчага лесагаспадарчага аб’яднання Вадзім Караленка праверыў стан тэхнікі, рыштунку пажарных лесаахоўнай галіны.
Потым лясныя ахоўнікі прыступілі да тушэння ўмоўнага ўзгарання. Першымі на барацьбу з вогненнай стыхіяй адправілася трактарная тэхніка, што ўзарала шырокай раллёй месца вакол узгарання, каб не даць агню распаўсюдзіцца па зямлі на больш шырокую тэрыторыю.
Неўзабаве падаспела і пажарная брыгада з ляснымі вогнетушыцелямі на аўтамабілі УАЗ.
Такія падраздзяленні існуюць пры кожным лясніцтве. Задача агняборцаў — прыступіць да лакалізацыі і тушэння пажару і вызначыць, калі калектыў здолее справіцца з агнём сваімі сіламі, а калі патрэбна і больш істотная дапамога.
Па легендзе вучэнняў пажар быў адносна буйны і лесаахоўнікаў падтрымала пажарная каманда, што падаспела на пажарным аўтамабілі.
А канчаткова патушыць агонь прыбылі выратавальнікі РАНС, якія “дабілі” і без таго ўжо кволага “чырвонага пеўня” з так званых вадзяных пушак.
Арцём ГУСЕЎ.
Фота аўтара.
Оставить комментарий