Губернатар вобласці Іван Крупко на мінулым тыдні наведаў гарадскі пасёлак Капаткевічы. Галоўная тэма візіту – запланаванае на 2024 год маштабнае добраўпарадкаванне населенага пункта. Кіраўнік вобласці падрабязна азнаёміўся з дзейнасцю ўстаноў сацыяльнай сферы, засяродзіўшы ўвагу на бягучых пытаннях і праблемах.
Першым аб’ектам наведвання губернатара стаў гарадскі Дом культуры.
Дырэктар установы Ядвіга Суботка пазнаёміла Івана Крупко з гісторыяй установы, яе заслугамі і дасягненнямі. Так, ва ўстанове культуры сёння працуе два калектывы са званнем “народны” і адзін “узорны”, якія сваю слаўную гісторыю пішуць не адно дзесяцігоддзе.
Іван Іванавіч пацікавіўся, наколькі сёння запатрабавана ў жыхароў гарадскога пасёлка ўстанова культуры.
– Усяго ва ўстанове функцыяніруе 16 клубных фарміраванняў, у тым ліку 7 для дзяцей і падлеткаў, – праінфарміравала губернатара дырэктар установы. – Больш за 3 тысячы чалавек на сённяшні дзень пражывае ў гарпасёлку, з іх больш за 900 – пенсіянеры і больш за 500 – дзеці да 18 гадоў. Таму наша задача – арганізацыя якаснага разнапланавага культурнага вольнага часу для рознаўзроставых груп насельніцтва. І людзі ідуць да нас.
У час знаёмства з установай ад заслуг і дасягненняў перайшлі да праблем. Паводле інфармацыі дырэктара, ёсць неабходнасць у рамонце фасада будынка, даху, замене вокнаў. Нядрэнна было б запланаваць рамонт глядзельнай залы, фае і танцавальнага класа. Але галоўная праблема ўстановы культуры – адсутнасць санітарных вузлоў. Іван Крупко ўважліва выслухаў кіраўніка ўстановы, аргументы старшыні раённага выканаўчага камітэта Аляксандра Кохана і запэўніў: пры планаванні работ па добраўпарадкаванні населенага пункта асноўныя праблемы ўстановы культуры будуць улічаны і вырашаны.
Наступны аб’ект у рабочым візіце губернатара – гарпасялковая бальніца з урачэбнай амбулаторыяй. Радыус абслугоўвання медустановы – 20 кіламетраў.
Іван Крупко пацікавіўся колькасцю койка-месцаў ва ўчастковай бальніцы. Іх, паводле інфармацыі загадчыка, – 36: 16 ложкаў тэрапеўтычнага профілю і 20 сястрынскага догляду. Наведваючы тэрапеўтычнае аддзяленне, Іван Іванавіч паразмаўляў з пацыентамі, пацікавіўся якасцю медыцынскага абслугоўвання і харчавання.
– Урачы і медсёстры ў нас вельмі ўважлівыя. Лекаў хапае. А кормяць так смачна, як дома, – запэўнілі губернатара мужчыны.
Цікавіла губернатара і пытанне ўкамплектаванасці ўрачэбнымі кадрамі. Медустанова на 100% укамплектавана і па ўрачах, і па сярэднім медыцынскім персанале. На пытанне пра каэфіцыент сумяшчальніцтва кіраўнік вобласці атрымаў наступную інфармацыю: ва ўрачоў у бягучым годзе ён склаў 1,37, у сярэдніх медыцынскіх работнікаў – 1,09. Перагрузкі вялікай няма, але ў той жа час, што немалаважна, ёсць магчымасць павялічыць заробак.
Пры наведванні кабінета ўрача агульнай практыкі зайшла размова пра дыспансерызацыю насельніцтва, прафесійныя і бягучыя медагляды. Як справядліва адзначыў губернатар, нават самы дбайны папяровы ўлік не параўнаецца з электроннай базай дадзеных пацыентаў. Даручэнне кіраўніцтву ЦРБ: камп’ютарызацыя УАЗ раёна і актыўнае ўкараненне электроннай базы дадзеных пацыентаў.
Як далажыў губернатару кіраўнік раёна Аляксандр Кохан, за 2016-2017 гады ва УАЗ праведзены бягучыя рамонты фае, калідора і лесвічнага маршу першага паверха, ардынатарскай, палат і калідора сацыяльнага паста на другім паверсе, абедзенай залы, часткова заменены вокны. Закрануў рамонт і паліклініку.
На пытанне аб праблемных момантах УАЗ на сённяшні дзень, Аляксандр Кохан далажыў наступнае: па-першае, тэрыторыя бальніцы, плошча якой складае 6700 квадратных метраў, у сілу працяглай эксплуатацыі асфальтавае пакрыццё, бардзюрныя камяні прыйшлі ў непрыдатнасць. Не менш значныя – бягучы рамонт у памяшканні ЦСА, лабараторыі і пральні. Што да апошняй, то маючы сястрынскае аддзяленне, без добрай прамысловай пральнай і сушыльнай машынамі УАЗ не абыйсціся. Іван Крупко пагадзіўся з неабходнасцю ўключэння ўсіх агучаных пазіцый у спіс запланаваных работ пры добраўпарадкаванні гэтага аб’екта аховы здароўя.
Пры наведванні ў гарпасёлку ўстановы дашкольнай адукацыі, губернатар вобласці адзначыў дагледжанасць і добрае афармленне тэрыторыі дзіцячага садка. У Івана Іванавіча адбылася размова з самымі галоўнымі экспертамі ў пытанні якасці прадастаўляемых установай адукацыі паслуг – трохгадовай Кірай і яе мамай.
– Наведваем садок мы ўсяго тыдзень, але ўжо цалкам адаптаваліся. Дзякуй педагогам за ўважлівае стаўленне да нашых дзетак і клопат, – падзялілася маладая маці. Пытанням добраўпарадкавання ва ўстанове надаецца шмат увагі. Зроблена нямала, у тым ліку за кошт пазабюджэтных сродкаў і дабрачыннай дапамогі.
Што датычыцца чаканых рамонтных работ па плане добраўпарадкавання гарпасёлка, то, паводле слоў кіраўніка Святланы Дашкевіч, першачарговая праблема – завяршэнне капітальнага рамонту астатняй часткі даху, замена аконных блокаў, частковая замена асфальтавага пакрыцця.
Іван Крупко пасля агляду ўстановы са спісам абазначаных праблем пагадзіўся.
Галіна КАЗАК.
Фота аўтара.
Оставить комментарий