Напярэдадні Міжнароднага жаночага дня супрацоўнікі аддзела ДАІ РАУС правялі ў райцэнтры святочны рэйд.
Мерапрыемства не тычылася праверкі аўтамабільных дакументаў, але на гэты раз вадзіцеляў транспартных сродкаў выбіралі мэтава — усе, хто скіраваў да ўзбочыны па сігнале жэзлу інспектара былі прадстаўніцамі прыгожай паловы.
— Прапаную прайсці да машыны ДАІ — ветліва прамаўляў прапаршчык міліцыі Віктар Купрацэвіч. Каля легкавіка праваахоўнікі віншавалі жанчын з надыходзячым святам, жадалі ўсяго найлепшага і дарылі кветкі.
Прыядналіся да акцыі і журналісты “Петрыкаўскіх навін” — на добрую памяць мы пакідалі жанчынам фірмовы нататнік нашага выдання.
— 8 сакавіка толькі заўтра і свядомасць пакуль занятая свойскімі побытавымі клопатамі, а тут такая цудоўная акцыя, якая з самага пачатку дня нагадвае пра клопат аб жанчынах з боку грамадства. Вялікі дзякуй за добры настрой і віншаванні.
Упэўнена, святочныя дні на такой узнёслай хвалі пройдуць цёпла і запамінальна — падзялілася ўражаннямі адна прадстаўніц цудоўнай паловы, якая атрымала кветкі ад супрацоўнікаў ДАІ.
Арцём ГУСЕЎ.
Фота аўтара.
Оставить комментарий