8 верасня прайшоў фінал конкурсу “Міс Беларусь 2023”. Петрыкаўшчыну прадстаўляла Анастасія Таргонская. Мы звязаліся з дзяўчынай адразу ж пасля шоу, каб даведацца пра ўражанні.
Бляск вачэй, яркія вобразы, незвычайныя дэкарацыі, без сумнення, фінальнае шоу Нацыянальнага конкурсу прыгажосці “Міс Беларусь 2023” было грандыёзным. Гэта маглі бачыць і тыя, хто сядзеў у зале “Палаца спорту”, і гледачы АНТ у час тэлетрансляцыі.
“Ад конкурсу я атрымала незабыўныя ўражанні, якія мне запомняцца назаўсёды, паўдзельнічаць у такім мерапрыемстве можна толькі раз у жыцці, – пачала размову канкурсантка. – Я пазнаёмілася з вялікай колькасцю выдатных людзей, з якімі мы абавязкова будзем падтрымліваць зносіны. Для мяне гэты конкурс – пачатак чагосьці новага!
Рада, што змагла паказаць сябе ў конкурсе такога маштабу, убачыць, як працуе вялізная каманда прафесіяналаў. Сукенкі былі зроблены асабіста для кожнай дзяўчынкі па яе мерках. Вельмі ўразіла водная праекцыя і фантаны на сцэне, такога яшчэ ніколі не было за гісторыю конкурсу.
Магу вылучыць выхад у нацыянальных касцюмах, кожную сукенку ўвасабляла нейкае месца Беларусі, у маім выхадзе гэта быў горад Нясвіж”.
Нягледзячы на тое, што прыгажуня не прайшла ў дзясятку найлепшых, дзяўчына не хвалюецца. Гаворыць, што ўжо ўдзел у конкурсе – ужо перамога.
“Міс Беларусь” – гэта конкурс не толькі пра прыгажосць знешнюю, але і ўнутраную. Гэта вялікая адказнасць, спалучэнне інтэлекту, адукацыі, элегантнасці і ўпэўненасці ў сабе”, – падвяла вынік петрыкаўчанка і ў канцы размовы падзякавала ўсіх за падтрымку, якую ёй аказвалі бацькі, сябры, педагогі і проста знаёмыя людзі.
Зараз Анастасія разам з блізкімі праводзіць вольны час, дзеліцца ўражаннямі і адпачывае. Хутка яе чакае вучоба ў Гомельскім гандлёва-эканамічным ўніверсітэце.
Наталля ПЕТРУШЭНКА.
Оставить комментарий