Каб не скончыць лета, як Страказа з вядомай басні Крылова, у Петрыкаве арганізаваны розныя летнія лагеры для дзяцей і падлеткаў. Сёння пра сапраўды карысны лагер расказала дырэктар Цэнтра творчасці дзяцей і моладзі Надзея Слабадзянюк.
“У нас працуе летняя аздараўленчая пляцоўка, у межах якой арганізавана работа лагера “Творцы”. Вядома, зацікавіць дзяцей мы вырашылі магчымасцю падзарабіць грашовыя сродкі, – пачала дыялог Надзея Слабадзянюк. – Упраўленне па працы і сацыяльнай абароне выдаткавала фінансы на такі фармат супрацоўніцтва. У маі нашы дзеці ў рамках другаснай занятасці пашылі чахлы для пераноскі касцюмаў з лагатыпам Цэнтра творчасці. Мы зрабілі тады 16 экзэмпляраў. Цяпер нашы дзяўчынкі шыюць яркія спадніцы для танцавальнага калектыву”.
Па словах Надзеі Леанідаўны, дзеці не проста шыюць, але яшчэ і малююць, фатаграфуюць і ўдзельнічаюць у розных конкурсах. Увогуле рэалізуюць сябе шматлікімі спосабамі, педагогі распрацавалі план і імкнуцца разнастаіць жыццё падлеткаў экскурсіямі і мерапрыемствамі.
“Творцы” – атрад, у назве якога раскрыта ўся сутнасць. Нават доўгачаканы адпачынак здольны рана ці позна стаміць, калі няма цікавага занятку. Калі мы вырашалі, над чым будзем працаваць, спыніліся на думцы, што нам вельмі не хапае чахлоў для пераноскі касцюмаў з лагатыпам Цэнтра творчасці. Мы часта ўдзельнічаем у шматлікіх конкурсах абласнога і рэспубліканскага ўзроўняў, таму зручна пераносіць такім чынам касцюмы, каб не пашкодзіць адзенне. Тым больш, прыемна, калі нашу вялікую каманду відаць здалёк”, – дадала ў канцы размовы дырэктар Цэнтра.
На пытанне, што ж падштурхнула дзяўчат прыняць удзел у лагеры, адзначылі так: гэтыя і жывыя зносіны, і асалода ў будучыні бачыць вынік сваёй працы на розных пляцоўках раёна, бо ў спадніцах будуць танцаваць удзельніцы танцавальнага калектыву “Аквамарын”, дзякуючы працы ёсць магчымасць адчуць сябе дарослымі і самастойнымі.
Наталля ПЕТРУШЭНКА, фота аўтара.
Оставить комментарий