Напярэдадні Дня работніка міліцыі ў зале раённага Дома культуры прайшоў святочны канцэрт. На мерапрыемстве прысутнічалі прадстаўнікі раённай улады, кіраўніцтва, супрацоўнікі і ветэраны органаў унутраных спраў.
Са словамі віншаванняў выступілі старшыня Петрыкаўскага раённага камітэта Аляксандр Кохан, начальнік аддзела ўнутраных спраў Петрыкаўскага райвыканкама падпалкоўнік міліцыі Аркадзь Масійчук, начальнік Петрыкаўскага аддзялення Дэпартамента аховы Міністэрства ўнутраных спраў падпалкоўнік міліцыі Руслан Сцяпанаў, старшыня Савета ветэранаў пярвічнай ветэранскай арганізацыі АУС Петрыкаўскага райвыканкама Васіль Дашкевіч.
Кіраўнік раёна павіншаваў супрацоўнікаў міліцыі, ветэранаў органаў унутраных спраў, з надыходзячым святам, падзякаваў за добрасумленную працу, пажадаў усім здароўя, у гэты нялёгкі час – чыстага неба над галавой. Аляксандр Васільевіч таксама ўручыў граматы Петрыкаўскага раённага выканаўчага камітэта і Петрыкаўскага раённага Савета дэпутатаў супрацоўнікам міліцыі за бездакорную службу, узорнае выкананне службовых абавязкаў, дасягненне высокіх паказчыкаў.
Начальнік аддзела ўнутраных спраў падпалкоўнік міліцыі Аркадзь Масійчук пажадаў калегам і іх сем’ям дабрабыту, росквіту і ажыццяўлення ўсіх планаў:
«Ужо больш за стагоддзе беларуская міліцыя з’яўляецца надзейнай апорай дзяржавы, абаронцай народа, заўсёды знаходзячыся на перадавой барацьбы з крымінальнымі праявамі. Супрацоўнікі і вайсковыя сістэмы АЗГ словам і справай штодня даказваюць вернасць прысязе, народу, дзяржаве. Гэтае свята сімвалізуе павагу да лепшых традыцый, назапашаных за ўсю слаўную гісторыю Міністэрства ўнутраных спраў».
Аркадзь Мікалаевіч ўручыў супрацоўнікам Петрыкаўскай міліцыі падзякі, граматы і нагрудныя знакі адрознення ад імя Упраўлення Унутраных спраў.
Не забыліся супрацоўнікі міліцыі ў гэты дзень і пра сваіх калег-жанчын. Прадстаўніц прыгожай паловы чалавецтва, якія праходзяць службу і працуюць у РАУС Петрыкаўскага райвыканкама, павіншавалі з надыходзячым 8 сакавіка.
Мерапрыемства скончылася творчымі нумарамі, падрыхтаванымі артыстамі Петрыкаўшчыны.
Наталля ПЕТРУШЭНКА. Фота аўтара.
Оставить комментарий