У пятніцу, 9 верасня, вечар у гарадскім парку абяцаў быць цікавым. Святочны канцэрт ладзілі актывісты райкама БРСМ з нагоды 20-годдзя Беларускага рэспубліканскага саюза моладзі.
Усе месцы ў глядацкім сектары амфітэатра былі занятыя. Разам са школьнікамі і прадстаўнікамі працуючай моладзі былі і людзі сярэдняга ўзроста, што, як мне падалося, з настальгічнай радасцю назіралі за мерапрыемствам. Яно і не дзіва – цяжка і падлічыць, колькі людзей аб’яднаў саюз моладзі, колькі творчых і стваральных задум удалося ажыццявіць, колькі добрых спраў было зроблена.
Урачыстасць распачалася са слоў віншавальнага адрасу райкаму БРСМ ад старшыні райвыканкама Аляксандра Кохана, якое зачытала прысутным намеснік кіраўніка раёна Святлана Сянько: “Усё, што зроблена за гэтыя гады грамадскім аб’яднаннем “БРСМ” – вынік карпатлівай працы кожнага з вас – упэўненых і крэатыўных, энергічных і мэтанакіраваных”. Святлана Уладзіміраўна далучылася да слоў віншавання і пажадала моладзі Петрыкаўшчыны творчых поспехаў, невычэрпнай энергіі для ажыццяўлення самых смелых ідэй.
Потым пачалася цырымонія ўзнагароджання. Падзякі за плённае супрацоўніцтва атрымалі прадстаўнікі многіх устаноў, прадпрыемстваў і грамадскіх арганізацый Петрыкаўшчыны. Першы сакратар Васіліна Маслава ад раённага камітэта “БРСМ” адзначыла граматамі і падарункамі сваіх актывістаў: “Усе мы розныя, нехта праявіў сябе ў творчай дзейнасці, іншыя – у вучобе. Ёсць і тыя, хто сціпла дапамагаў нам ва ўсіх пачынаннях парай працавітых рук, дзякуй усім вам!”.
Апрача ўзнагарод прысутныя атрымалі музычныя падарункі ад творчай моладзі Петрыкаўшчыны.
Арцём ГУСЕЎ, фота аўтара.
Оставить комментарий