Спецыяльнасць з адценнем хакі. Як стаць курсантамі ваенных факультэтаў, расказалі школьнікам

На базе гімназіі прайшла прафарыентацыйная сустрэча па паступленні на ваенныя факультэты ВНУ Рэспублікі Беларусь.
Перад вучнямі старэйшых класаў стаіць адно важнае пытанне: “На якой спецыяльнасці спыніць свой выбар?”. Менавіта ў наш час дадзеная праблема набывае вельмі важны сэнс, бо цвёрдая канкурэнцыя на рынку працы прымушае задумацца школьнікаў і іх бацькоў над гэтым пытаннем.

Правільны адказ на яго ўплывае на далейшы лёс чалавека. Не разгубіцца, правільна зарыентавацца, знайсці сваё месца ў вялізным свеце прафесій складана, асабліва маладому чалавеку, які скончыў школу. Ён павінен спыніць свой выбар на прафесіі, важнай для яго, патрэбнай грамадству і адпаведнай запытам і інтарэсам рынку працы. Менавіта пра гэта ў час сустрэчы распавядаў начальнік групы арганізацыі адбору на ваенную службу ваеннага камісарыята Гомельскай вобласці падпалкоўнік Сяргей Акулаў перад старшакласнікамі гарадскіх школ і гімназіі.

Сяргей Барысавіч паказаў майстар-клас у зборцы і разборцы аўтамата Калашнікава з заплюшчанымі вачыма, дэталёва спыніўся на ўсіх перавагах ваеннай спецыяльнасці, а таксама на тым, якія сацыяльныя гарантыі даюць ваенныя факультэты будучаму курсанту і яго блізкім.

“Наша дзяржава робіць усё магчае, каб кожны з вас стаў сапраўдным грамадзянінам сваёй краіны, а атрыманая адукацыя наваенных факультэтах дапаможа вам стаць не толькі самастойнай асобай, дапаможа вам развіць фізічныя ўменні, а таксама забяспечыць вас ўсім неабходным”, – канстатаваў Сяргей Акулаў.
Дзеці ў канцы сустрэчы задавалі важныя пытанні і атрымлівалі на іх разгорнутыя адказы. У рамках прафарыентацыйнага мерапрыемства хлопцам таксама прадэманстравалі ваеннае ўзбраенне і вайсковы рыштунак.

Наталля ПЕТРУШЭНКА.
Фота аўтара.