У Беларусі пачынаецца сезон водпускаў. Нягледзячы на зняцце большасці пандэмійных абмежаванняў, абраць месца для адпачынку за мяжой лягчэй не стала. Для тых, хто не хоча рызыкаваць і жадае гарантавана атрымаць цікавы і насычаны адпачынак, мы прапануем застацца на Петрыкаўшчыне. Дзе і як можна правесці час з карысцю і не ўдарыць па бюджэце – у нашым матэрыяле.
Першы ў спісе пункт, які можна смела назваць Альма-матар сучаснага адпачынку – Нацыянальны парк “Прыпяцкі”.
Не наведаць гісторыка-этнаграфічны комплекс “Музей пад адкрытым небам”, які размясціўся ў самым жывапісным кутку Ляскавічаў – вялікае апушчэнне. Абавязкова – рабіць на памяць яркія здымкі на прыродзе, пакаштаваць у кафэ “Дом палешука” нацыянальныя стравы: каўбаскі “Палеская”, “Гурман”, “Паляўнічая”, прыгатаванне якіх суправаджаецца водарам вішнёвай і грушавай шыпы ў тэхніцы гарачага вэнджання. Ну, і вядома, традыцыйныя дранікі. З рулетаў – аленіна з грыбамі.
Можна, напрыклад, наведаць назіральную вежу, з якой добра відаць панараму нацыянальнага парку, асабліва там прыгожа ў час вясновага разліву. На тэрыторыі знаходзіцца будынак народных рамёстваў, млын, які ўжо стаяў у гэтай мясцовасці ў 18-19 стагоддзях. Яшчэ дзве дзіцячыя пляцоўкі, дзе маці змогуць пагуляць з дзецьмі.
“Прыпяцкі” прапануе гісторыка-культурныя туры: “Сафары-парк” (дэманстрацыйная пляцоўка “Музей прыроды” ў гасцях у Кудзесніка), “Музей прыроды” ў Тураве, “Старажытнасці Тураўшчыны”, рачны шпацыр на цеплаходзе ці на маторнай лодцы (катамаране).
З мінулага года нацыянальны парк прапануе водныя туры. Вы ўбачыце ва ўсёй красе разліў ракі Прыпяць, заліўнымія лугі і ўнікальны ўчастак поймавых дуброў, некранутых дзейнасцю чалавека.
Па дарозе зможаце ўбачыць мноства вясновых пералётных птушак – лебедзяў, качак, гусей, чапель, кулікоў, станем сведкамі іх шлюбных гульняў. Будзеце пераадольваць перашкоды з завалаў упалых падтопленых дрэў, праплываць старыя пойменныя вярбы і дубы.
Звяртайцеся па тэлефоне:8-2350 5-70-17, калі ў вас ўзніклі пытанні.
Для атрымання якасных медыцынскіх паслуг варта завітаць у Дзіцячы рэабілітацыйна-аздараўленчы цэнтр “Пціч” – месца для дзіцячага, індывідуальнага і сямейнага адпачынку. Ва ўстанове, што размясцілася недалёка ад жывапіснага ўзбярэжжа ракі Пціч, прадстаўлены шырокі выбар фізіятэрапеўтычнага лячэння. На тэрыторыі ёсць свідравіна мінеральнай вады кшталту “Міргарадская”.
Для баўлення часу дзяцей і падлеткаў ёсць уся неабходная інфраструктура: басейн, стадыён, прадуктовая крама, відэасалон, танцавальная зала, фітабар, лазня, зала камп’ютарных гульняў.
У апошні час усё больш папулярным становіцца адпачынак у аграсядзібах.
У кожнай з іх вас сустрэнуць з усёй душой і гасціннасцю Палескага краю. Кожная з аграэкасядзіб раёна, якіх у нас 11, па-свойму асаблівая.
У шматлікіх аграсядзібах вы зможаце атрымаць асалоду ад рыбалкі, наведаць лазню, паласавацца прадуктамі ўласнай вытворчасці.
Некаторыя з аграэкасядзіб размяшчаюцца паблізу ад нацыянальнага парку “Прыпяцкі” і арганізоўваюць розныя турыстычныя мерапрыемствы, сярод якіх паходы, пешыя і веласіпедныя прагулкі.
Актыўны адпачынак – арганізацыя рыбалкі і палявання, сплаваў па рацэ, катанне на лодках і катамаранах. Сямейны адпачынак – шпацыры на свежым паветры, наведванне лесу, збор грыбоў і ягад, купанне ў вадаёмах, экалагічна чыстая ежа, наведванне лазні і саўны, прыгатаванне шашлыку, настольныя гульні, караоке. Тэлефон для даведак: 2-70-58.
Петрыкаўскі лясгас прапануе аглядную экскурсію па дзіўных месцах Петрыкаўшчыны, на аўтамабілі або лодцы – выбіраць вам!
Водны маршрут уяўляе сплаў па рацэ Пціч. Працягласць экскурсіі – не менш за тры гадзіны. На водным маршруце можна ўбачыць водную і лугавую расліннасць, дзейнасць і месцы рассялення выдры, норкі, андатры, бабра. Прадугледжаны прыпынак ва ўрочышчы “Набруснае”.
Аўтамабільная экскурсія “Падарожжа па Петрыкаўскай зямлі” праходзіць па маршруце ад доміка паляўнічага Петрыкаўскага лясгаса па дарогах: Лучыцы-Кашэвічы, Кашэвічы-Капцэвічы, Капцэвічы-Капаткевічы, Капаткевічы-Першая Слабодка, Першая Слабодка-Лучыцы.
Парк памешчыка Вільсана размешчаны каля тэрыторыі дома паляўнічага Петрыкаўскага лясгаса. У парку сустракаюцца розныя пароды дрэў і хмызнякоў: граб, ліпа, клён, чаромха, глог, асіна, ясень, дуб, вяз, ліпа.
За больш падрабязнай інфармацыяй вы можаце звярнуцца па тэлефоне 8-029-329-47-07.
Наталля ПЕТРУШЭНКА.
Оставить комментарий