Уборачная кампанія не за гарамі, і ад таго, наколькі якасна да яе падрыхтуюцца аграрыі, залежыць не толькі хуткасць збору ўраджаю, але і яго якасць.
Дзяржаўны тэхнічны агляд – сур’ёзны экзамен.
– Спраўнымі камбайны лічацца толькі пасля праходжання тэхагляду, звяртаю на гэта асаблівую ўвагу. Своечасова падрыхтаваная тэхніка – гэта адсутнасць страт пры ўборцы культур, – адзначыў галоўны дзяржаўны інспектар упраўлення сельскай гаспадаркі і харчавання Петрыкаўскага райвыканкама Дзмітрый Каленік.
Толькі спраўны камбайн здольны захаваць саму машыну, жыццё механізатару, а таксама вырашчаны ўраджай. Таму ў працэсе тэхагляду зернеўборачнай тэхнікі асаблівая ўвага была нададзена працаздольнасці і экалагічнай бяспецы тэхналагічнага абсталявання, тэхнічнай спраўнасці сістэм і вузлоў, наяўнасці першасных сродкаў пажаратушэння, аптэчак, а таксама рэгістрацыйных дакументаў.
Адзін за другім механізатары дэманстравалі якасць падрыхтаванасці свайго камбайна, паказваючы, як працуюць рулявая і тармазная сістэмы, светлавыя прыборы, ці спраўны стоп-сігнал.
“Палессе-Аграінвест” стала адным з першых прадпрыемстваў АПК раёна, якое не толькі якасна, але і да намечанага тэрміну падрыхтавала да тэхагляду 100% тэхнікі. Неблагі паказчык у гэтай важнай справе мае сельскагаспадарчае прадпрыемства БК-АГРА ААТ “Чалюшавічы”. З 7 адзінак тэхнікі паспяхова прайшлі агляд 6 – гэта 86%. Адна зернеўборачная машына пакуль знаходзіцца на рамонтных работах, але ў хуткім часе далучыцца да строю.
Варта адзначыць, што тэхагляд у хуткім часе пройдуць усе гаспадаркі Петрыкаўшчыны.
Падводзячы вынікі, Дзмітрый Каленік адзначыў, што камбайнеры з вялікай адказнасцю падышлі да правядзення мерапрыемства. Цяпер аграрыяў праэкзаменуе сама ўборачная.
Марыя ТАМКО, фота аўтара.
Оставить комментарий