У апошні час у адрас адміністрацыі фізкультурна-аздараўленчай залы ўсё часцей прыходзяць добрыя водгукі ад наведвальнікаў. Людзі заўважаюць, як абнаўляецца інвентар, як у залах з’яўляецца новае абсталяванне. Надышоў час назваць тых, чыя неабыякавасць і “кліч сэрца” дапамаглі гэтым зменам здарыцца. Гэтыя людзі доўга заставаліся ў цені, аддаючы перавагу справам, а не гучным словам, але, як гаворыцца, краіна павінна ведаць сваіх герояў.
Гавораць, што моцная дзяржава пачынаецца з моцнага грамадства і неабыякавых людзей. Героі нашага артыкула – менавіта такія людзі. Для іх словы “сацыяльная адказнасць” – не проста лозунг, а канкрэтная добрая справа.
Карпаратыўная апора: уклад у будучыню
Важкую падтрымку галіне спорту аказалі нашы буйныя партнёры: прадстаўніцтва “Белдзяржстраху” па Петрыкаўскім раёне ў асобе дырэктара Паліны Бельскай – дзякуючы іх спонсарскай дапамозе зала настольнага тэніса змянілася. Зараз у распараджэнні аматараў пінг-понгу два сучасныя прафесійныя сталы, якасныя ракеткі і мячы.
Футбольны клуб “Шахцёр” і яго дырэктар Аляксандр Новік – бязвыплатна перадалі пераносныя вароты, якія сталі важным папаўненнем асноўных сродкаў і пашырылі магчымасці для трэніровак.
ДП “Петрыкаўскае ПМС” на бязвыплатнай аснове перадало спартыўную форму і абутак для каманды футбалістаў.
Прыватная ініцыятыва: асабісты ўклад мецэнатаў
Асаблівая падзяка прад-прымальнікам, якія справай даказваюць адданасць роднаму раёну. Так, дзякуючы ініцыятыве кіраўнікоў прыватных прадпрыемстваў: “Апеўпрам” Яўгенію Воранаву, “Максікам-С” – Яўгенію Насеку, “Жэ-Вер” – Пятру Вяргею – умацавана матэрыяльна-тэхнічная база залы ФАКу: у ёй з’явіўся сучасны трэнажор “Сілавая рама”, неабходны для якаснай атлетычнай падрыхтоўкі.
Дырэктар ТАА “Экагрынпрам” Віктар Капыловіч перадаў у дар набор алімпійскіх дыскаў, якія ўжо актыўна выкарыстоўваюцца нашымі цяжкаатлетамі. А дырэктар ТАА “Алангандаль” Анатолій Піскун – прафесійны трэнажор “Лаўка для жыму штангі”.
– Спорт – гэта не толькі медалі, але і ўмовы, у якіх растуць будучыя чэмпіёны. І сёння гэтыя ўмовы сталі лепшыя дзякуючы людзям, для якіх падтрымка здаровага ладу жыцця – гэта не абавязак, а шчыры парыў.
Мы шчыра ўдзячныя кожнаму, хто знайшоў магчымасць падтрымаць наш ФАК. Ваша дапамога – гэта ўклад у здароўе і энергію нашых жыхароў, – пазначыла ў размове нашаму карэспандэнту дырэктар Валянціна Урбанчык.
Вялікі дзякуй вам, паважаныя землякі, за вашу шчодрасць і неабыякавасць! Вы – тыя людзі, на якіх варта раўняцца. Ваша падтрымка – гэта магутны стымул для нашых атлетаў ісці да новых перамог.
Няхай ваша справа квітнее, а дабро, зробленае для раёна, вернецца вам сто разоў!
Галіна КАЗАК.
Фота аўтара.
Оставить комментарий