На днях, праязджаючы праз аграгарадок Грабаў, звярнула ўвагу на спартыўную пляцоўку ў цэнтры населенага пункта.
Яна прыцягнула мой погляд, бо там “кіпела” жыццё: дзятва гуляла ў валейбол, іншыя бавілі час на турніках, а побач, на лавачках, сядзелі дарослыя, якія прывялі сваіх малых пагуляць.
Убачанае выклікала ў мяне цікавасць, таму вырашыла даведацца: хто ж стаў ініцыятарам і арганізатарам прасторы для карыснага баўлення вольнага часу.
Прысутныя з задавальненнем падзяліліся інфармацыяй. Аказалася, што пляцоўка была тут і раней. Але за апошні год дадзеная тэрыторыя перажыла сапраўднае адраджэнне: участак добраўпарадкаваны, заменена старое спартыўнае абсталяванне, набытыя новыя элементы для заняткаў спортам. Гэтыя змены кардынальна пераўтварылі тэрыторыю, зрабіўшы яе сапраўдным цэнтрам прыцягнення вяскоўцаў.
Дзеці аднадушна прызналіся, што гэта іх любімае месца для баўлення часу. Як высветлілася, пляцоўка прыцягвае не толькі дзяцей.
– Гэтую тэрыторыю наведваюць не толькі дзеці, але і працоўная моладзь, дарослыя, – адзначыў шматдзетны бацька Мікалай Грыгарэвіч. – Добра, калі ёсць магчымасць вечарам або ў выхадны дзень прыйсці пагуляць у футбол ці валейбол. Задума і старанні мясцовай улады апраўдаліся на ўсе 100 %.
Словы Мікалая падтрымліваюць і яго землякі: ініцыятыва па добраўпарадкаванні спартыўнай пляцоўкі была своечасовай і запатрабаванай.
Аднак, у атрыманай інфармацыі не хапала нейкага звяна, каб скласці поўную карціну. Суцэльную яснасць унесла тэлефонная размова са старшынёй Грабаўскага сельскага Савета Галінай Кажаноўскай. Як аказалася, спартыўная пляцоўка – частка праекта “Здаровыя гарады і пасёлкі”, які рэалізуецца на Петрыкаўшчыне.
– Гэтая ініцыятыва накіравана на паляпшэнне якасці жыцця і здароўя мясцовых жыхароў. Рэалізуецца праграма пры актыўным удзеле шэрагу ўстаноў і арганізацый. Асноўны наш партнёр і каардынатар – раённы цэнтр гігіены і эпідэміялогіі, – адзначыла Галіна Мікалаеўна. – Для рэалізацыі праграмы намі таксама набыты стэнды па здаровым ладзе жыцця, якія размешчаны ў філіяле мясцовага дома культуры, сельсавеце ў даступных месцах.
Праект “Грабаў – здаровы аграгарадок” разлічаны на перыяд з 2025 па 2029 год. Гэта азначае, што спартыўная пляцоўка, якую мы бачым сёння, – толькі пачатак. У бліжэйшыя гады яна будзе папаўняцца новымі элементамі сучаснага абсталявання для заняткаў спортам, ствараючы яшчэ больш магчымасцей для актыўнага адпачынку і фізічнага развіцця жыхароў Грабава.
Святлана СОБАЛЕВА,
фота аўтара.
Оставить комментарий