З пачаткам вясенняй сяўбы перад аграрыямі Петрыкаўшчыны пастаўлены адказныя задачы. У такі напружаны перыяд асаблівую важнасць набывае стварэнне ўмоў для эфектыўнай працы. Адным з такіх фактараў з’яўляецца арганізацыя гарачага харчавання.
Карэспандэнты “Петрыкаўскіх навін” прасачылі за дадзеным працэсам на прыкладзе ААТ “Пціч-Агра”.
У гэтым годзе за падрыхтоўку абедаў для механізатараў ААТ “Пціч-Агра” адказваюць работнікі сталовай Петрыкаўскага ПМС: кухары Кацярына Юхневіч і Тамара Белкавец, кухонны рабочы Наталля Дзягцяр. Варта адзначыць, што сталовая прадпрыемства меліяратыўных сістэм у такой важнай справе задзейнічана ўпершыню.
– Мы па-свойму ўносім уклад у будучы ўраджай – гатуем смачныя абеды для нашых аграрыяў, – адзначыла загадчык вытворчасці Ала Яўменава. – Спецыяльнага меню для сельгаснікаў не складаем: што плануем для сваіх, тое прапануем і механізатарам.
Жанчына дэманструе меню, якое ўражвае разнастайнасцю. Мясныя стравы на тыдзень практычна не паўтараюцца: тут і катлеты, паджарка, падліўка, мяса розных гатункаў. Першыя стравы і гарніры таксама на любы густ. Акрамя таго, да кампота або чаю работнікі сталовай выпякаюць свежыя булачкі. У час прыезду карэспандэнтаў абед прадугледжваў боршч, макароны з катлетамі, салат са свежай гародніны. Усё выглядала вельмі апетытна.
У пазначаны тэрмін на транспарце сельгасарганізацыі прыязджае раздатчык. Ежай запаўняюцца асобныя для кожнага чалавека тэрмакантэйнеры. Важна адзначыць, што порцыі досыць аб’ёмныя, што немалаважна для людзей, якія займаюцца цяжкай фізічнай працай.
– Раніцай работнікам сталовай паведамляем колькасць неабходных абедаў на дзень – у нас харчуюцца да дваццаці чалавек. Працаваць са сталовай вельмі камфортна і зручна, – дзеліцца раздатчыца Алена Коль. – Бывае, “паёк” неабходна даставіць у дзесяць пунктаў. Але дзякуючы спецыяльным тэрмасам, ежа застаецца гарачай.
Машына з гарачымі абедамі прыбывае на поле. Механізатары, убачыўшы знаёмы транспарт, пад’язджаюць да прызначанага месца. Перад тым, як атрымаць сваю порцыю, яны мыюць рукі пад чуткім наглядам Алены. Пасля атрымання кантэйнера, некаторыя з іх ідуць прымаць ежу ў абсталяваны столікам кузаў, але большасць аддае перавагу абедаць проста на траве, пад адкрытым небам.
Нягледзячы на інтэнсіўны працоўны дзень, мужчыны знаходзяцца ў добрым настроі, жартуюць, дзеляцца ходам “палявых” спраў. Яны не супраць пагутарыць і з работнікамі СМІ. Толькі не доўга – кожная хвіліна на рахунку. Цікавімся меркаваннем наконт арганізацыі харчавання.
– Кормяць нас сытна. Я нават не магу сказаць, якія стравы мне больш падабаюцца. Усё, што прапануюць работнікі сталовай, прыгатавана смачна, – дзеліцца Андрэй Кісялевіч.
– Прывозяць усё гарачае, духмянае. Наядаемся спаўна. Дзякуй за такія абеды, – дадае Валерый Самбук.
Яшчэ мужчыны расказалі, што прыкладны кошт абеда складае ад 6 да 7 рублёў. Гаспадарка для сваіх работнікаў аплачвае 50 % ад кошту. Выходзіць за абед прыкладна 3 рублі, згадзіцеся – зусім не дорага. Механізатары адзіныя ў думцы: гарачае харчаванне дадае сіл і жадання працаваць да позняга вечара.
Пажадаем нашым аграрыям баявога настрою і добрага надвор’я.
Дзякуй вам за працу на зямлі, шаноўныя!
Святлана СОБАЛЕВА, фота Марыі ТАМКО.
Оставить комментарий