Дарагія сябры, калегі, ветэраны і, вядома ж, нашы любімыя чытачы! Сёння ў нас асаблівы, па-сапраўднаму гістарычны дзень. Нашай роднай газеце спаўняецца 95 гадоў!

Амаль цэлае стагоддзе «раёнка» жыве ў адным рытме з раёнам, піша яго летапіс і становіцца госцем у вашых дамах. Для газеты 95 гадоў — гэта не проста прыгожая дата. Гэта тысячы бяссонных начэй, сотні тысяч пройдзеных кіламетраў і мільёны слоў, напісаных пра галоўнае: пра людзей, якія тут жывуць і працуюць. Свайму калектыву я хачу сказаць вялікі дзякуй драйв, за ўменне знаходзіць цікавае ў паўсядзённым і за тое, што ў кожны нумар вы ўкладваеце часцінку душы. Вы — сэрца газеты. Няхай натхненне ніколі не пакідае вас, а кожны новы загаловак чапляе за жывое!

 Нашым ветэранам — нізкі паклон. Вы стварылі той падмурак і тыя традыцыі, на якіх мы стаім сёння. У вас мы вучыліся не проста пісаць, а адчуваць адказнасць за кожнае слова. Мы беражліва захоўваем ваш досвед і імкнемся трымаць планку гэтак жа высока.

 Пазаштатным аўтарам наша ўдзячнасць за дзесяцігоддзі плённага супрацоўніцтва і любоў да «раёнкі».

 Нашым чытачам — асобны, самы цёплы дзякуй. Без вас газета — гэта проста папера. Ваша падтрымка, вашы лісты, званкі і нават крытыка — гэта тое, што прымушае нас рухацца наперад. Дзякуй за вашу адданасць, за тое, што застаецеся з намі. Мы пішам для вас і дзеля вас.

 Дзякую і нашым заснавальнікам — раённаму выканаўчаму камітэту і раённаму Савету дэпутатаў, а таксама партнёрам за надзейнае плячо і шчырае супрацоўніцтва. Разам мы робім адну вялікую справу — дапамагаем нашаму раёну развівацца і квітнець.

 З юбілеем, любімая газета!

 Жадаю ўсім нам даўгалецця, толькі добрых навін, вострага пяра і невычэрпнага аптымізму. Няхай наперадзе ў нашай «раёнкі» будзе яшчэ шмат яркіх старонак! Са святам, шаноўныя!

 Рэдактар Галіна КАЗАК