Сёння выратавальнікі на вадзе адзначаюць 150 гадоў з дня стварэння першага выратавальнага таварыства, што стала правобразам ТВВода. Гэтая дата – добрая нагода падзякаваць вялікай камандзе беларускіх выратавальнікаў на вадзе, якія могуць ганарыцца ўжо не адной сотняй тысяч выратаваных жыццяў за гэты працяглы перыяд.
На асаблівым рахунку сярод арганізацый Гомельшчыны – Петрыкаўская выратавальная станцыя ТВВод. У шэрагах раённай арганізацыі таварыства налічваецца 3824 жыхары Петрыкаўшчыны, аб’яднаныя ў 70 пярвічных арганізацый.
Асноўная задача нашай службы – недапушчанне здарэнняў на вадзе. Таму ў нашым ужытку часцей гучыць слова “прафілактыка”, чым “буйкі”, “шлюпка”, “вадалаз”. Толькі летась прадстаўнікі райарганізацыі ТВВод правялі больш 180-ці сустрэч у дзіцячых і працоўных калектывах і звыш 1200-от індывідуальных гутарак.
Статыстыка гаворыць сама за сябе: у параўнанні з сітуацыяй 10-15-гадовай даўніны, колькасць няшчасных выпадкаў на вадзе ў Петрыкаўскім раёне знізілася ў два разы.
Усе выратавальнікі не стамляюцца нагадваць правілы пяці “НЕ”, якія павінен ведаць кожны: НЕ купацца ў забароненых месцах, НЕ заходзіць у ваду ў стане алкагольнага ап’янення, НЕ скакаць з берага ў ваду ў незнаёмых месцах, НЕ арганізоўваць гульні на вадзе, НЕ пакідаць малалетніх дзяцей без нагляду каля вадаёмаў ці буйных ёмістасцяў з вадой.
Вадалазы і матарысты штогод праходзяць строгі медыцынскі агляд, матросы-выратавальнікі здаюць іспыт на ўменне хутка плаваць, веславаць на лодцы, кідаць выратавальны круг, праводзіць рэанімацыйныя мерапрыемствы. Нашыя работнікі – людзі рознага ўзросту, але аб’ядноўвае іх адна годная мэта – стаяць на варце чалавечых жыццяў.
Зараз на чале Петрыкаўскай выратавальнай станцыі вопытны вадалаз Алег Паўлючак, сярод ветэранаў службы варта адзначыць Віктара Палтарана, Руслана Мандрусава, Ганну Сухамераву, на якіх раўняецца маладая змена выратавальнікаў. Старанна і самааддана яны нясуць кругласутачную вахту на водах Петрыкаўшчыны.
Аляксандр ТРУХАНОВІЧ,
кіраўнік райарганізацыі ТВВод.
Фота Арцёма ГУСЕВА.
Оставить комментарий