У райвыканкаме прайшло ўручэнне пашпартоў юным землякам у рамках усебеларускай грамадзянска-патрыятычнай акцыі “Мы грамадзяне Беларусі” і з нагоды Дня Канстытуцыі.
Сярод прысутных панавала ўрачыстая атмасфера, бо на мерапрыемства былі запрошаныя не толькі прадстаўнікі падрастаючага пакалення Петрыкаўшчыны, якія атрымлівалі сёння галоўны дакумент грамадзяніна Беларусі, але і іх аднагодкі. З прамовай да прысутных юнакоў і дзяўчат звярнулася намеснік старшыні райвыканкама Святлана Сянько: “Мы сабраліся напярэдадні аднаго з самых важных дзяржаўных святаў нашай краіны – Дня Канстытуцыі. Усе 30 гадоў, з моманту прыняцця Асноўнага закона, наша краіна ўстойліва развіваецца на канстытуцыйнай аснове, як дэмакратычная, сацыяльна-прававая дзяржава, дзе галоўная каштоўнасць – чалавек.
Зараз у Беларусі створаны ўсе ўмовы для духоўна-маральнага, інтэлектуальнага і фізічнага развіцця моладзі. Ідзіце наперад да абранай мэты і ніколі не здавайцеся. Памятайце, што галоўнае наканаванне грамадзяніна – служыць Айчыне. Дзе б вы не былі: на сваёй зямлі, ці далёка за межамі Беларусі, заўсёды памятайце і ганарыцеся сваёй Радзімай. Віншую вас з вельмі важнай падзеяй у жыцці і жадаю абраць годны шлях свайго развіцця”, – заўважыла Святлана Уладзіміраўна.
За тым паўтара дзясятка нашых юных землякоў атрымалі пашпарты грамадзян Рэспублікі Беларусь, кветкі і падарункі. Да віншаванняў далучыўся і намеснік пракурора раёна Алег Мінаў. “Разам з правамі, якія гарантуе вам Канстытуцыя на вас ускладаюцца і абавязкі. Зараз яны ў вас простыя: старанна вучыцца, дапамагаць бацькам, але чым больш дарослымі вы будзеце станавіцца, тым больш істотнымі будуць станавіцца і вашыя абавязкі. Заставайцеся годнымі грамадзянамі, шануйце закон, нашыя традыцыйныя каштоўнасці. Такім чынам, на падмурку, што стварылі мы і многія пакаленні продкаў, вы здолееце пабудаваць квітнеючую будучыню Беларусі”, – прамовіў Алег Паўлавіч.
Звярнулася да дзяцей першы сакратар райарганізацыі грамадскага аб’яднання “БРСМ” Дар’я Туравец: “Дзяржаўная палітыка нашай краіны ў значнай ступені арыентаваная менавіта на моладзь. Разам з тым, краіна бярэ адказнасць за абарону інтарэсаў і рэалізацыю канстытуцыйных правоў кожнага свайго грамадзяніна. Жадаю ўсім моцнага здароўя, жыццёвай энергіі, мірнага неба над галавою. Няхай гэты дзень застанецца незабыўнай для вас падзеяй чарговага этапу жыцця”.
З словам ад падрастаючага пакалення выступіла перад прысутнымі Лізавета Прыходзька, якая атрымала ў гэты дзень запаветны дакумент: “Наша асноўная задача шанаваць і захоўваць закладзеныя ў Канстытуцыі каштоўнасці і развіваць стабільную, прававую, квітнеючую краіну. Перакананая, што моладзь зробіць істотны ўклад у далейшае ўмацаванне краіны. Абяцаем памятаць сваю гісторыю, шанаваць законы, быць шчырымі і справядлівымі ў сваіх думках і дзеяннях”.
Маладыя артысты падрыхтавалі для прысутных творчыя падарункі, пасля чаго ўсе былі запрошаныя на традыцыйнае фота на памяць.
Арцём ГУСЕЎ. Фота аўтара.
Оставить комментарий