Шквалісты вецер, які разгуляўся ў Беларусі ў сярэдзіне мая, на шчасце, не нанёс сур’ёзнага ўрону лясам Петрыкаўшчыны. Аднак яго наступствы па сённяшні дзень не ліквідаваны на тэрыторыі Магілёўшчыны. На чыстку лесу ад ветравалу і буралому да суседзяў амаль адразу накіраваліся супрацоўнікі лясной галіны нашага раёна.
– Першая група з ліку работнікаў лясгаса была сфарміравана і накіравана ў лясніцтвы Магілёўскага ДВЛГА яшчэ ў маі. За гэты час у распрацоўцы лесасек, пацярпелых ад разгулу стыхіі на тэрыторыі Магілёўшчыны, было задзейнічана 24 чалавекі, – адзначыла ў час размовы намеснік дырэктара па ідэалагічнай рабоце ДЛГУ “Петрыкаўскі лясгас” Юлія Сцяпук.
Па інфармацыі Юліі Іванаўны, пашкоджаныя непагодай участкі, на якіх даводзіцца працаваць работнікам лясгаса, амаль на 70% – гэта хвойныя пароды, добрая частка якіх знаходзіцца ў цяжкадасягальных месцах, што, канешне ж, ускладняе іх распрацоўку з улікам як умоў надвор’я, так і асаблівасцяў грунту. Аднак, як зазначыла Юлія Сцяпук, на ліквідацыі наступстваў стыхіі задзейнічаны вопытныя работнікі, таму планавыя задачы, пастаўленыя Мінлесгасам, будуць выкананы ў пазначаны тэрмін.
– Нашым лясгасам распрацавана каля 23,3 гектара ветравальна-бураломных лесасек, нарыхтавана – 5926 кубічных метраў драўніны, стралявана – 5760 кубічных метраў, – паведаміла ў час размовы Юлія Іванаўна. – Адначасова за змену на ліквідацыі наступстваў стыхіі ад нашых падраздзяленняў задзейнічана каля 20 чалавек з выкарыстаннем 4-х бензапіл, 2-х харвестараў, 2-х форвардараў, пагрузачна-транспартныя машыны для тралёўкі і 2-х МТЗ з граблямі для ачысткі лесасек. Таксама задзейнічаны 3 аўтамабілі МАЗ для аператыўнай вывазкі драўніны. Работнікамі лясгаса рэгулярна ажыццяўляецца кантроль за выкананнем правіл тэхнікі бяспекі і аховы працы пры правядзенні ўсіх работ, а таксама кантроль за вывазкай лесу. Зараз колькасць задзейнічанай тэхнікі і людскіх рэсурсаў значна меншая – паступова лясны фонд Магілёўшчыны ачышчаецца ад ветравалу і буралому.
Галіна КАЗАК,
фота Юліі СЦЯПУК.
Оставить комментарий