У нядзелю, 17 красавіка, у спартыўнай зале ДЮСШ адбылася 5-я спартакіяда сярод ветэранаў фізічнай культуры і спорту Петрыкаўскага раёна, прымеркаваная да Года гістарычнай памяці.
Спартсмены паважанага ўзросту спаборнічалі ў шашках, шахматах, настольным тэнісе, дартсе. Акрамя гэтага мужчыны выяўлялі лепшых у більярдзе. Трэба адзначыць, што ўдзелькаў на турнір сабралося, бадай, не менш, чым на спартакіяду сярод арганізацый, устаноў і сельсаветаў, а гэта каля двух з паловай дзясяткаў чалавек. Адных жыхароў Капаткевіцкага сельсавета быў, пэўна, цэлы аўтобус.
Урэшце, лепшым у шашках сталі Мікалай Хамец, што выступаў за грамадскую арганізацыю “Ветэраны фізічнай культуры і спорту Петрыкаўскага раёна” і Таццяна Антанішына з Капаткевіцкага сельсавета.
Роўных у шахматах не было Мікалаю Мазуркевічу (“Ветэраны ФКіС”). Лепшымі ў валоданні малой ракеткай у той дзень былі Васіль Пінчук (Капаткевіцкі сельсавет) і Аксана Кавальчук (Савет ветэранаў).
У трапнасці кідання дроцікаў лепшымі вынікамі вызначыліся Мікалай Антанішын (Капаткевіцкі сельсавет) і Марына Корж (“Ветэраны ФКіС”).
Што тычыцца спаборніцтваў у більярдзе, то тут першынства было за Уладзімірам Літашом (“Ветэраны ФКіС”).
Акрамя гэтага грамадскае аб’яднанне ветэранаў спорту Петрыкаўшчыны папоўнілася новымі членамі, а галоўны суддзя спаборніцтваў Жан Дубіна заўважыў: “Яшчэ да пачатку спаборніцтваў было зразумела, што ўсе ўдзельнікі – ужо пераможцы, бо нязменна крочаць па жыцці поруч са спортам!”.
Арцём ГУСЕЎ, фота аўтара.
Оставить комментарий