Цырымонія ўзнагароджання лепшых работнікаў культуры прайшла ў зале раённага Дома культуры напярэдадні Дня работніка культуры.
З прывітальным словам да прысутных звярнулася намеснік старшыні райвыканкама Святлана Сянько. Яна адзначыла, што работнікі культуры нясуць святло ў наша жыццё.
“Дарагія работнікі культуры, ветэраны галіны, віншую вас з прафесійным святам: Днём работніка культуры. Сёння ў галіне культуры функцыянуюць 56 устаноў культуры, працуе больш за 160 кіраўнікоў і спецыялістаў, выступае 16 калектываў са званнем «Народны», «Узорны». Свята аб’ядноўвае прафесіяналаў сваёй справы, спецыялістаў клубных устаноў, кіраўнікоў калектываў мастацкай самадзейнасці, бібліятэкараў, музейных работнікаў. Словы асаблівай падзякі за творчасць, адданасць сваёй справе хачу выказаць калектыву Капаткевіцкага Дома культуры, Петрыкаўскай дзіцячай школы мастацтва, Дома рамёстваў і многім-многім іншым”.
Работнікам культуры напярэдадні прафесійнага свята былі ўручаны ўзнагароды ад раённага выканаўчага камітэта і Савета дэпутатаў.
Начальнік аддзела ідэалагічнай работы, культуры і па справах моладзі райвыканкама Святлана Блінец і старшыня Петрыкаўскай раённай арганізацыі Беларускага прафесійнага саюза работнікаў культуры, інфармацыі, спорту і турызму Таццяна Галіцкая далучыліся да шчырых слоў віншавання і працягнулі прыемную цырымонію ўзнагароджання.
Да віншавання далучыўся вакальны гурт «Славяне» горада Мазыра.
Н. Петрушэнка.
Фота аўтара.
Оставить комментарий