Магчыма, нехта з гараджан заўважыў, што ў апошні працоўны дзень мінулага тыдня горад напоўніўся незвычайна вялікай колькасцю машын лесаахоўнай службы – працаўнікі лясной галіны сабраліся павіншаваць адзін аднаго напярэдадні свайго прафесійнага свята.
Першай на ўрачыстасці ў раённым Доме культуры павіншавала прысутных з Днём работнікаў лесу намеснік старшыні райвыканкама Аляксандра Янчанкава, якая ўручыла працаўнікам лясной галіны Граматы і Падзякі Міністэрства лясной гаспадаркі, Гомельскага дзяржаўнага вытворчага лесагаспадарчага аб’яднання, Петрыкаўскага райвыканкама.
Звяртаючыся да працаўнікоў лесаахоўнай службы, дырэктар Петрыкаўскага лясгаса Арцём Анішчонак заўважыў: “Дарагія калегі, прыміце словы падзякі за ваш прафесіяналізм, самаадданасць справе. Упэўнены, што і ў далейшым, абапіраючыся на традыцыі папярэдніх пакаленняў, мы будзем дынамічна развіваць наша прадпрыемства, эфектыўна выкарыстоўваць лесанасенны патэнцыял, укараняць новыя тэхналогіі і садзейнічаць развіццю нашай галіны і краіны. Так, мы багата часу праводзім на працы, гэта заслугоўвае павагі, але няхай наша справа прыносіць не толькі дабрабыт і карысць, няхай тое, што мы робім, нясе яшчэ і задавальненне”.
Арцём Мікалаевіч уручыў падначаленым нагрудныя знакі Міністэрства лясной гаспадаркі “10 гадоў бездакорнай службы ў дзяржаўнай лясной ахове Рэспублікі Беларусь”. Адпаведныя знакі атрымалі і спецыялісты, што прысвяцілі лясной гаспадарцы два дзясяткі гадоў свайго жыцця, а таксама павіншаваў прафесіяналаў сваёй справы з прысваеннем І і ІІ класа ляснічых і майстроў лесу. Акрамя гэтага, былі ўручаныя Ганаровыя граматы і Падзякі Петрыкаўскага лясгаса.
Цырымонія ўзнагароджання была аздоблена творчымі нумарамі артыстаў раённага Дома культуры, якія, мяркуючы па рэакцыі прысутных, прыйшліся спецыялістам лясной гаспадаркі даспадобы.
Арцём ГУСЕЎ, фота аўтара.
Оставить комментарий