Наступіла зімовая пара, апрача чаканага снегу і марознага надвор’я снежань імкліва нясе буйная патокі халоднага паветра. А гэта значыць, што дарожныя знакі пачало круціць вакол восі свайго замацавання парывістымі вятрамі. Пераканацца ў гэтым можна на ўласныя вочы.
Не «сышліся ў поглядах» на праезную частку знакі на скрыжаванні вуліц Каралёва і Валадарскага: зараз яны паглядаюць перпендыкулярна адзін адносна другога.
Далей, па вуліцы Валадарскага знак з абмежаваннем хуткасці, перад штучнай няроўнасцю на дарозе, таксама развярнула.
Потым сустракае глухім ляскатам апавяшчэнне пра сканчэнне галоўнай дарогі, на скрыжаванні з Пушкіна. Здаецца, крыху мацнейшы парыў і металічная плоскасць адправіцца ў палёт, бо замацаваная яна на адным хамуце. Дарэчы рысы, што перакрыжоўваюць белае і жоўтае поле — сцерліся, што робіць сэнс знака супрацьлеглым, а гэта ўжо небяспечна.
Наступны – наш добра вядомы сябра на скрыжаванні з вуліцай Савецкай, тут абодва знакі паглядаюць у супрацьлеглыя бакі і не адзін не скіраваны як след. А “забарона павароту ўлева” зусім апусцілася долу.
Зразумела, што ў адказных службаў зараз напружаны перыяд — час вызваляць праезную частку і тратуары ад снегу, але спадзяваемся, што і знакі атрымаюць належную ўвагу: усё ж хутка Новы год, у горад завітае шмат гасцей, якія не так добра ведаюць вуліцы Петрыкава, як землякі.
Арцём ГУСЕЎ. Фота аўтара.
Оставить комментарий