Сёння ў раённым доме культуры панавала асаблівая, урачыстая і па-сямейнаму цёплая атмасфера.Напярэдадні прафесійнага свята тут сабраўся калектыў Петрыкаўскага лясгаса — людзі, чыімі рукамі, клопатам і нястомнай працай захоўваецца і прымнажаецца галоўнае нацыянальнае багацце нашай краіны. Павіншаваць нашых лесаводаў прыйшлі ганаровыя госці — кіраўніцтва раёна. Са словамі глыбокай павагі і ўдзячнасці да прысутных звярнуўся старшыня раённага выканаўчага камітэта Яўгеній Шкробат. Яўгеній Сяргеевіч шчыра падзякаваў працаўнікам галіны за добрасумленнасць, высокую адказнасць і клопат аб аднаўленні лясоў, пажадаў усім вытворчых поспехаў, моцнага здароўя, а галоўнае — дабрабыту і спакою ў кожнай сям’і. Прыемным і хвалюючым момантам стала ўручэнне заслужаных узнагарод ад раённага выканаўчага камітэта. Пад гучныя апладысменты калег Ганаровымі граматамі за сваю адданую працу былі адзначаны Міхаіл Маскальчук і Аляксандр Боўсун
Наступнага прамоўцу калектыў сустрэў асабліва гучнымі апладысментамі. Да мікрафона запрасілі чалавека, які трымае руку на пульсе кожнага ляснога квартала раёна, — дырэктара лясгаса Івана Торчыка. Выступленне кіраўніка было па-бацькоўску цёплым, пранікнёным і вельмі важным. Іван Мікалаевіч нагадаў, што сёлетні год — асаблівы, юбілейны.Лясная галіна і Петрыкаўскі лясгас адзначаюць 90-годдзе з дня ўтварэння! Дырэктар з гонарам гаварыў пра пераемнасць пакаленняў і пра тое, што сённяшні калектыў трымае высокую вытворчую планку. Ён выказаў шчырую ўдзячнасць кожнаму працаўніку за плённую працу і адданасць справе. Пасля была доўгачаканая і хвалюючая частка — уручэнне высокіх галіновых узнагарод: Ганаровай граматай Міністэрства лясной гаспадаркі ўзнагароджаны Аляксандр Дробаў Падзяка міністра лясной гаспадаркі аб’яўлена Васілю Какоры Ганаровай граматай Гомельскага дзяржаўнага вытворчага лесагаспадарчага аб’яднання адзначаны Мікалай Пінчук Падзяка Гомельскага ДВЛГА аб’яўлена Юрыю Юркаўцу і Віктару Дамасевічу
Урачысты марафон на сцэне РДК дасягнуў свайго піку, калі пачалося ўручэнне ўнутраных узнагарод Петрыкаўскага лясгаса.І каму, як не дырэктару прадпрыемства Івану Торчыку, ведаць, колькі сіл, бяссонных начэй і мазалёў стаіць за кожным кубаметрам лесу і кожным пасаджаным гектарам. Граматы кіраўнік уручаў асабіста. Для кожнага свайго работніка ў Івана Мікалаевіча знайшліся асаблівыя, цёплыя словы падзякі. А дапоўніла іх тое самае моцнае, сапраўднае мужчынскае рукапацісканне, якое даражэй за любыя доўгія прамовы.Гэта быў знак глыбокай павагі кіраўніка да нялёгкай працы сваіх калег. Мужчыны заставаліся мужчынамі — знешне стрыманымі і сур’ёзнымі, але ў кожнага ў вачах свяцілася шчырая радасць. Атрымаць прызнанне ад роднага кіраўніка, ды яшчэ і пад апладысменты перапоўненай залы галоўнай сцэны раёна— момант, які запомніцца на гады! Гэтыя людзі штодзень даказваюць: Петрыкаўскі лясгас—гэта адна вялікая, надзейная і згуртаваная сям’я.
Оставить комментарий