Гатоўнасць да новага навучальнага года: камісія ацэньвае работу ўстаноў адукацыі

Сёння ў раёне стартавала важная кампанія — работа камісіі па прыёмцы ўстаноў адукацыі да новага навучальнага года. Спецыялісты правяраюць не толькі стан класных пакояў, але і бяспеку тэрыторыі, гатоўнасць харчблокаў, спартыўных залаў і наяўнасць усёй неабходнай дакументацыі.

-Падрыхтоўка да 1 верасня — гэта заўсёды маштабны працэс, які патрабуе ад калектываў школ максімальнай канцэнтрацыі намаганняў. Установы адукацыі правялі вялікую работу: былі праведзены касметычныя рамонты, абноўлена матэрыяльна-тэхнічная база, праведзена азеляненне прышкольных тэрыторый, — адзначыла намеснік старшыні райвыканкама Наталля Ходзька. Адным з першых аб’ектаў, які наведала камісія, стала Брынёўская сярэдняя школа. Тут да прыходу вучняў падышлі з адказнасцю.

Адміністрацыя школы адзначыла, што падрыхтоўка пачалася адразу пасля заканчэння мінулага навучальнага года. У навучальнай установе былі праведзены неабходныя рамонтныя работы. Асаблівая ўвага была нададзена ўладкаванню вучэбных кабінетаў, якія сталі больш светлымі і ўтульнымі. У бягучым годзе калектыў установы на пасадцы лесу зарабіў каля чатырох тысяч рублёў. Фінансавыя сродкі былі накіраваны на набыццё ілюміцэнтных ламп у навучальныя кабінеты

Камісія па прыёмцы ўстаноў адукацыі да новага навучальнага года наведала Ляскавіцкую сярэднюю школу і Ляскавіцкі дзіцячы сад.

— Мы разумеем, наколькі важна, каб установы адукацыі сустрэлі дзяцей абноўленымі, камфортнымі і прыгожымі, — адзначыла начальнік аддзела адукацыі Петрыкаўскага райвыканкама Людміла Жукавец. — Кожны педагог, работнік уклаў часцінку сваёй душы ў тое, каб навучальны працэс быў не толькі эфектыўным, але і прыемным. Як было адзначана, у Ляскавіцкай сярэдняй школе акрамя касметычнага рамонту кабінетаў быў зроблены рамонт даху і ўваходнай групы, набытыя камп’ютарныя крэслы. У дзіцячым садку з’яіліся новыя, прыгожыя і зручныя лаўкі – падарунак дашкольнай адукацыі ад Нацыянальнага парку “Прыпяцкі”.

Напярэдадні пачатку навучальнага года традыцыйна праходзіць праверка гатоўнасці ўстаноў адукацыі. Камісія, якая наведала Галубіцкую сярэднюю школу, дала высокую ацэнку праведзенай працы. Аднак галоўнай падзеяй, якая прыцягнула ўвагу адпаведных службаў стала “адраджэнне” школьнай спартыўнай залы. Гэтае памяшканне доўгі час было “балючым пунктам” установы: пэўны час праз аварыйны стан зала была закрыта для наведвання. Сёлета сітуацыя кардынальна змянілася. Дзякуючы ініцыятыве і самаадданай працы калектыву школы, спартыўная зала зноў адчыніла свае дзверы.

Макарыцкая базавая школа сустрэне вучняў 1 верасня абноўленымі класнымі пакоямі і кабінетамі