Гандаль з душою

26 ліпеня сваё прафесійнае свята адзначаюць работнікі гандлю. Хлеб, малако, адзенне, тавары побыту – з дня ў дзень мы заходзім у крамы, дзе сустракаем тых, хто клапоціцца пра нашы надзённыя патрэбы.

Хто яны, гэтыя людзі? Як прыйшлі ў прафесію, чаму абралі менавіта яе? З такім пытаннем мы звярнуліся да дырэктара ПГУП “Власта-Люкс” Лідзіі Андрэеўны Шыкінай – чалавека, які 48 гадоў прысвяціў гэтай галіне.

– Працаваць у гандлі марыла з дзяцінства. Мне проста гэта падабалася і я ведала, што буду займацца толькі гэтай справай. Адразу пасля школы пайшла вучыцца ў Гомельскі кааператыўны тэхнікум “Белкаапсаюза”. У 18 гадоў пачала працоўную дзейнасць прадаўцом спажывецкага таварыства ў горадзе Петрыкаве і болей з гандлёвага “шляху” не збочвала – у працоўнай кніжцы толькі дзве старонкі, – расказвае гераіня. –

З 1986 года займала пасаду загадчыцы крам спажывецкай кааперацыі, а ў 1998 годзе вырашыла пачаць сваю справу – стала індывідуальным прадпрымальнікам. Займалася таварамі прамысловай групы, гандлявала на рынку. З цягам часу зразумела, што патрэбна развівацца, так з’явілася харчовая крама.

Зараз у прыватным прадпрыемстве Лідзіі Андрэеўны дзве гандлёвыя кропкі – харчовая і прамысловая. Пад кіраўніцтвам дырэктара працуе 6 работнікаў. “Мае дзяўчаты” – ласкава называе іх кіраўнік і адзначае, што яны не проста калектыў, а накшталт сям’і: разумеюць патрэбы кожнага, прыходзяць адзін аднаму на дапамогу. Ёсць на гандлёвым прадпрыемстве Лідзіі Андрэеўны і свае “старажылы”: з Галінай Ходзька разам працуюць ужо 20 гадоў, а Ларыса Самбук нядаўна адзначыла 14-годдзе працоўнай дзейнасці ў ПГУП “Власта-Люкс”.

– Асаблівасці невялікіх крам – душэўнасць, свойскасць: мы ведаем сваіх пакупнікоў, добра вывучылі іх патрэбы. Адзін набывае любімыя пірожныя, а іншы – толькі аднаму віду хлеба ці малака аддае перавагу. Дзяўчаты сустракаюць пакупнікоў з усмешкай, цікавяцца пра здароўе, абмяркоўваюць нейкія сямейныя пытанні. І, безумоўна, пры заказе тавару ўлічваюць просьбы людзей. Гэта выгадна адрознівае такія крамы, як наша, ад вялікіх супермаркетаў, дзе праца прадаўца падобна на канвеер, – адзначыла кіраўнік прыватнага прадпрыемства.

Дырэктар ПГУП “Власта-Люкс” – прафесіянал гандлёвай дзейнасці. На працягу десяцігоддзяў яна са сваім калектывам добрасумленна абслугоўвае насельніцва горада і раёна. Яе дзейнасць у сферы гандлю адзначана Дыпломам Петрыкаўскага раённага выканаўчага камітэта ў 2011 годзе і Удзячнасцю начальніка галоўнага ўпраўлення гандлю і паслуг Гомельскага абласнога выканаўчага камітэта ў бягучым годзе.

Лідзія Андрэеўна – адна з яркіх прадстаўніц галіны, без якіх нельга ўявіць наша паўсядзённае жыццё.

Надзея СІГАЙ,
фота аўтара.