Добраўпарадкаванне нашых вуліц – справа агульная, і кожны радок у гэтай рабоце павінен пісацца своечасова. Аднак жыхары вуліцы Маякоўскага звярнулі ўвагу на праблему, якую цяжка не заўважыць. Дакладней, заўважыць яе замінаюць хіба што высокія зараснікі.
Размова ідзе пра мясцовую меліярацыйную канаву. Гэты аб’ект – не проста элемент ландшафту, а важная інжынерная сістэма, якая адказвае за адвод лішкаў вады і спакой мясцовых жыхароў падчас праліўных дажджоў ці вясенняй адлігі. Сёння ж канава больш нагадвае непраходныя джунглі: яна шчыльна зарасла пустазеллем, хмызняком і травой.
Відавочна, што ў графіку адпаведных службаў гэты адрас чамусьці выпаў з поля зроку. Магчыма, недагледзелі, магчыма, адклалі “на пасля”.
Мы ўпэўнены, што гэты крытычны сігнал стане для адказных службаў штуршком да рашучых дзеянняў. Навесці парадак на вуліцы Маякоўскага трэба бліжэйшым часам, пакуль асеннія дажджы не ператварылі гэты недагляд у сапраўдную камунальную бяду.
Парадак любіць своечасовасць. Чакаем рэакцыі і канкрэтных спраў!
А.МАКСІМАЎ.
Фота аўтара.
Оставить комментарий