У суботу, 16 снежня, мы завіталі на гарадскі рынак і наведалі калядны кірмаш. Забягаючы наперад нагадаем, што адпаведныя кірмашы пройдуць у Петрыкаве і Капаткевічах 23 і 30 снежня.
Пакупнікоў, шчыра кажучы, мы сустрэлі няшмат, але навагодні настрой на кірмашы адчуваўся. Магчыма, нават па той прычыне, што прадаўцы мелі час для кожнага кліента і былі прыемна ўражаны ўвагай з боку журналістаў.
Некаторы час мы назіралі за пляцоўкай петрыкаўскага лясгасу каля крамы “3 цаны”, дзе прадавалі навагоднія дрэўцы. Раслін за стракатай навагодняй агароджай было не багата, але і цікавіліся гараджане ў асноўным толькі тым, ці можна будзе набыць елку і хвою бліжэй да святаў.
“Справа ў тым, што калі вы паставіце зараз елку ў кватэры, то да Новага года яна абсыплецца, трохі больш доўга прастаіць у належным выглядзе хвоя, яшчэ больш працяглы тэрмін дрэвы нармальна будуць адчуваць сябе ў прыватным доме. Але, усё ж такі, больш мэтазгодна паставіць навагоднія расліны пазней, каб яны без праблем прастаялі і Новы год і Ражство. Таму мы пакуль не высякаем багата дрэў з дзялянкі для продажу, але, калі попыт будзе павялічвацца, то і елак, і хвой будзем падвозіць больш”, – растлумачылі спецыялісты лесагаспадарчай службы.
У астатнім жа, людзі, у большасці сваёй, цікавіліся сельскагаспадарчай прадукцыяй, набывалі неабходную садавіну і гародніну, попытам карысталіся таксама дамашняя кансервацыя, сушаная рыба, арэхі і мачоныя яблыкі.
Нам жа застаецца запрасіць землякоў і гасцей Петрыкава і Капаткевічаў на чарговы кірмаш у гэтую суботу, бо ўжо надыходзіць час, калі трэба запасацца неабходным да святаў, каб потым не шукаць рэчы і прадукты харчавання ў апошнія дні, марнуючы час у пераднавагодніх чэргах.
Арцём ГУСЕЎ, фота аўтара.
Оставить комментарий