З нязначнымі маразамі, якія ўсталяваліся, аматары зімовай рыбалкі ўсё больш і больш часу праводзяць на вадаёмах. На жаль, многія з іх забываюць пра небяспеку ледзянога полага. На тэрыторыі рэспублікі ўжо ёсць першыя ахвяры тонкага лёду. Але нягледзячы на падобныя выпадкі “заўзятых” рыбакоў не спыніць.
Днямі працаўнікі МНС і супрацоўнікі таварыства ратавання на водах праводзілі рэйд па ўпадабаных месцах рыбакоў, на гэты раз на лёд выйсці не вырашыліся – таўшчыня зусім маленькая. А слядоў, так скажам, “першапраходцаў” на яшчэ неакрэплым лёдзе – па ўсім затоне.
Шукаць доўга парушальнікаў не прыйшлося, з самай раніцы яны ўжо занятыя сваёй любімай справай. Начальнік дзяжурнай змены Сяргей Чыгіроў пры дапамозе гучнагаварыцельнай прылады на аварыйна-выратавальнай тэхніцы МНС папрасіў рыбакоў не падвяргаць сваё жыццё небяспецы і вярнуцца дадому, а таксама нагадаў асноўныя правілы бяспекі пры выхадзе на лёд.
– Катэгарычна забараняецца выходзіць на лёд пры яго таўшчыні менш за 7 сантыметраў. На адным і тым жа вадаёме можа быць розная таўшчыня лёду. Перш чым выходзіць на лёд, неабходна праверыць яго трываласць. Калі лёд пачынае трашчаць, трэба тым жа маршрутам ісці зваротна, бо рухаючыся далей у любы момант можна праваліцца. Кожны рыбак павінен мець пры сабе элементарныя сродкі выратавання – гэта выратавальная камізэлька і спецыяльныя зачэпы, – распавёў супрацоўнік МНС.
Выратавальнікі звяртаюць увагу і бацькоў: не трэба дазваляць дзецям адпраўляцца на вадаём. Лёд – не месца для забаў. Пры няўстойлівых тэмпературных рэжымах змяншаецца шчыльнасць лёду і выхад на ваду становіцца небяспечным, таму не варта грэбаваць тэхнікай бяспекі, а лепш ад гэтай задумы і зусім адмовіцца.
Алена ГЕРАСІМЕНКА.
Оставить комментарий