Сёння ў аграгарадку Ляскавічы пачаў работу першы студэнцкі атрад сезона 2023 «Маладосць» імя партызанкі Аляксандры Глушко.
Як распавяла першы сакратар раённай арганізацыі грамадскага аб’яднання “Беларускі рэспубліканскі саюз моладзі” Васіліна Маслава, выпускнікі і вучні старэйшых класаў Ляскавіцкай сярэдняй школы ў канікулярны перыяд будуць працаваць з 8:30 гадзін раніцы да 12:30, як толькі пачнецца вучэбны працэс — з 15 да 17 гадзін дня.
«Часцяком маладым людзям даводзіцца абмяжоўвацца вельмі сціплымі сродкамі на арганізацыю свайго вольнага часу, таму яны ўсё яшчэ залежаць ад бацькоў. І самым аптымальным варыянтам у такім выпадку з’яўляецца праца ў студэнцкім атрадзе, дзе ёсць магчымасць цікава і з карысцю для сябе правесці канікулы, зарабіць грошы, — распавяла Васіліна Алегаўна. — На працягу 10 дзён вучні будуць наводзіць парадак на тэрыторыі «Прыпяцкага», у выніку змогуць зарабіць больш за 100 беларускіх рублёў».
Па словах лідара БРСМ, праца студэнцкіх атрадаў на практыцы даказала сваю эфектыўнасць. У 2022 годзе было працаўладкавана больш за 42 тысячы маладых людзей. У Петрыкаўскім раёне — 116 чалавек. За гэтымі лічбамі стаіць канкрэтны малады чалавек, які быў працаўладкаваны, ведае цану капейцы і ўжо мае досвед працы ў калектыве. Ён стварае, развівае, і гэты напрамак становіцца насамрэч ключавым. У 2023 годзе беларускія студэнцкія атрады адзначаць юбілей — 60-годдзе.
Н. ПЕТРУШЭНКА.
Фота аўтара.
Оставить комментарий