Азеляненне і прафілактыка палаў: надзённыя справы прыродаахоўнай службы

У суботу, 6 красавіка, на Гомельшчыне прайшоў Адзіны дзень азелянення пад дэвізам “Разам для зялёнай Беларусі”.

Як адзначыў начальнік райінспекцыі прыродных рэсурсаў і аховы навакольнага асяроддзя Ігар Зянкевіч, у гэты дзень юнакі і дзяўчаты з гарадскіх школ, а таксама працаўнікі камунальнай гаспадаркі, пад куратарствам прыродаахоўнай структуры далі жыццё 135-ці дрэўцам, што знайшлі сваё месца па вуліцы Муляраўскай.
Пройдзе час, саджанцы стануць высокімі дрэвамі, што будуць сустракаць гараджан і гасцей горада на адным у паўночных уездаў у Петрыкаў.

– Яшчэ адной з надзённых задач прыродаахоўнай інспекцыі ў гэты час з’яўляецца прафілактычная работа па тлумачэнні забароны падпальвання сухой расліннасці. Статыстыка сведчыць, што толькі 5-10 % такіх узгаранняў адбываюцца з-за ўмоў надвор’я. Астатняя масавая доля палаў сухой травы – па віне чалавека. Прычын людской неахайнасці некалькі: часцей за ўсё гэта недагляд за вогнішчам у час адпачынку на прыродзе, кінуты ў сухую расліннасць незатушаны недакурак ці, нават, наўмыснае падпальванне з хуліганскіх памкненняў. Аднак, часам, такія падпальванні адбываюцца з-за недасведчанасці грамадзян, якія лічаць, што такім чынам яны “вызваляюць” зямлю ад мінулагодняй пажоўклай травы і “ўзбагачаюць” яе попелам, – заўважыў Ігар Пятровіч.

На самой справе, адзначае начальнік райінспекцыі, ад спальвання глеба становіцца значна бяднейшай на карысныя рэчывы, разам з прадуктамі гарэння ў паветра трапляюць шкодныя злучэнні, у тым ліку радыеактыўныя і ядавітыя, што пераносяцца ветрам на істотную адлегласць. Бяднее і відавы састаў расліннасці, а на пагарэлая зямлі замест разнатраўя пачне панаваць пустазелле. У полымі гінуць кладкі яек, знішчаюцца месцы гнездавання птушак.

Нагадваем, што за выпальванне сухой расліннасці прадугледжана адміністрацыйная адказнасць у выглядзе штрафу памерам ад 10-ці да 30-ці базавых велічынь. Больш за тое, асобы, што дапусцілі падпальванне, абавязаны пакрыць шкоду, якую такімі дзеяннямі прычынілі навакольнаму асяроддзю. Сума пакрыцця шкоды можа дасягаць 200-от базавых велічынь за гектар выпаленай тэрыторыі. Акрамя гэтага, артыкулам 16.41 Кодэкса аб адміністрацыйнай адказнасці прадугледжана пакаранне за развядзенне вогнішчаў у забароненых месцах, такіх як зоны масавага адпачынку грамадзян, прыродныя тэрыторыі, што асабліва ахоўваюцца і іншыя.

Па выніках мінулага года на Гомельшчыне структурнымі падраздзяленнямі Мінпрыроды было складзена 29 адміністрацыйных пратаколаў, накладзена 21-на штрафная санкцыя на агульную суму 7,2 тысяч рублёў. На тэрыторыі Петрыкаўшчыны летась да адміністрацыйнай адказнасці прыцягнута дзве фізічных асобы, накладзена штрафных санкцый на суму 310 рублёў.

Запісаў Арцём ГУСЕЎ.