Палеткі сельскагаспадарчага ўнітарнага прадпрыемства “Палессе-Аграінвест” у мінулую пятніцу сталі месцам правядзення раённага свята “Зажынкі”. Метавіта ў лепшай гаспадарцы раёна быў дадзены старт уборачнай кампаніі 2023 года. Удзельнікамі ўрачыстасці сталі прадстаўнікі органаў раённай улады, упраўлення сельгасхарчу райвыканкама, кіраўнікі і галоўныя спецыялісты сельгаспрадпрыемстваў Петрыкаўшчыны, а таксама працаўнікі мясцовай гаспадаркі.
Над ячменным полем, якое раскінулася паміж вёскамі Вышалаў і Галубіца і стала ў той дзень месцам правядзення старадаўняга земляробчага рытуалу – зажынання першага снапа, ліліся зажыначныя песні ў выкананні народнага ансамбля песні, танца і музыкі “Лявоніха” Капаткевіцкага ГДК, гучалі святочныя прамовы, і над наваколлем чуўся рокат камбайнаў, што разбудзілі хлебную ніву і далі старт жніву.
Са святам хлебаробаў павін-шаваў старшыня райвыканкама Аляксандр Кохан:
– Цяперашні ўраджай у полі – гэта вынік клопату шматлікіх людзей: механізатараў, якія апрацоўвалі глебу перад сяўбой, сеялі і праводзілі мерапрыемствы па ахове раслін, работнікаў, якія рыхтавалі зерне, вадзіцеляў, якія падвозілі насенне ў поле, аграномаў, якія клапаціліся пра ўраджай.
Звяртаючыся да камбайнераў, Аляксандр Васільевіч адзначыў, што сёння менавіта яны галоўныя героі ўрачыстасці, і што ад іх старання залежыць вынік працы ўсяго калектыву.
– Галоўнае цяпер, і гэта неаднаразова падкрэсліваў кіраўнік дзяржавы Аляксандр Лукашэнка, – прыбраць вырашчаны ўраджай да апошняга зярнятка, – пазначыў кіраўнік раёна.
Падчас урачыстасці камбайнерам і вадзіцелям павязалі чырвоныя стужкі і пажадалі добрых і хуткіх намалотаў.
Па добрай традыцыі ўдзельнікаў жніва, зернеўборачную тэхніку і ўсіх прысутных на свяце гасцей на плённую работу благаславіў і акрапіў святой вадой благачынны Петрыкаўскай акругі, настаяцель храма Свяціцеля Мікалая Цуда-творцы пратаіерэй Васіль Немеш. І каб механізатарам спадарожнічаў поспех – кожнаму ўручылі па абярэгу.
Першыя каласкі, па ўсіх звычаях, з песнямі зжалі ўдзельніцы мастацкай самадзейнасці Чалюшчавіцкага сельскага Дома народнай творчасці. Галоўны важкі сноп прыбраных зерневых уручылі старшыні райвыканкама Аляксандру Кохану. Снапы паменш жніцы перадалі першаму намесніку старшыні Алегу Козінцу і кіраўнікам гаспадарак раёна. Румяным і духмяным караваем з ураджаю зерня мінулага года, а таксама хлебным квасам пачаставалі ўсіх гасцей свята.
Ганаровае права даць старт уборачнай кампаніі “Жніво-2023” было прадстаўлена дырэктару УП “Палессе-Аграінвест” Аляксандру Верамееву, які аддаў каманду камбайнерам, тыя занялі свае месцы і пачалося жніво.
Цяпер уся надзея на спрыяльнае надвор’е, уборачную тэхніку і сумленную працу механізатараў. А яе наперадзе нямала: зерневы клін на Петрыкаўшчыне складае – 8,9 тысячы гектараў.
– Сёлета на палетках Петры-каўшчыны на жніве будзе задзейнічаны 51 зернеўборачны камбайн, на адвозцы зерня – 135 адзінак тэхнікі, на дапрацоўцы зерня – 16 зернесушыльных комплексаў.
Па стане на раніцу 11 ліпеня ў раёне прыбраны азімы ячмень на плошчы 70%, азімая сурэпіца – 100%, рапс – 13%, – паведаміў у час размовы першы намеснік старшыні райвыканкама, начальнік упраўлення сельскай гаспадаркі і харчавання Алег Козінец.
Галіна КАЗАК.
Фота Наталлі ПЕТРУШЭНКА.
Оставить комментарий