Мінуўшае лета на Петрыкаўшчыне стала часам вяселляў і першых усмешак нованароджаных. Раён сёлета, як распавяла нашаму карэспандэнту начальнік аддзела ЗАГС райвыканкама Ганна Грэська, быў асабліва багаты на шчаслівыя падзеі. Лічбы гавораць самі за сябе: за тры летнія месяцы ў раёне нарадзіліся 37 немаўлят і былі створаны 39 новых сем’яў.
Падрабязнасці – у нашым матэрыяле.
Хлопчыкі і дзяўчынкі: статыстыка на карысць маленькіх прыгажунь
Па інфармацыі Ганны Іванаўны, непасрэдна ў аддзеле ЗАГС зарэгістравалі 22 нованароджаныя, а з улікам сельвыканкамаў лічба вырасла да 37. Сярод іх – 16 хлопчыкаў і 21 дзяўчынка. На гэты раз дзяўчынкі апынуліся ў лідарах, і гэта, мабыць, нагода для асаблівай радасці: няхай растуць прыгожымі, разумнымі і шчаслівымі!
– Цікава і тое, як размеркаваліся малыя па чарзе нараджэння. Першынцамі сталі 15 дзяцей – для бацькоў гэта заўсёды асаблівы, хвалюючы момант і вопыт. Другімі ў сям’і з’явіліся 8 немаўлят, трэцімі – 4, чацвёртымі – 7. Яшчэ ў дзвюх сем’ях нарадзілася пятае дзіця, а ў адной – шостае. Гэта не проста лічбы: гэта гісторыі вялікага кахання і самаахвярнасці, прыклад сапраўднай сямейнай крэпасці, годны глыбокай павагі, – дадала начальнік аддзела ЗАГС.
Імёны як жыццёвы арыенцір
Выбар імя – момант трапяткі і вельмі асабісты. У гэтым сезоне бацькі праявілі і вернасць традыцыям, і творчую смеласць.
Так, сярод дзяўчынак часцей за ўсё сустракаліся імёны Міраслава, Ганна і Ксенія – гучныя, прыгожыя, напоўненыя сэнсам. А вось у хлопчыкаў карціна атрымалася па-сапраўднаму ўнікальная: усе 16 імёнаў аказаліся рознымі – ніводнага паўтору! Кожны хлопчык атрымаў сваё, адметнае імя, якое будзе гучаць толькі для яго. Асабліва запомніліся Эльдар, Марсэль і Дзямід – рэдкія і выразныя, яны нібы абяцаюць сваім уладальнікам яркі лёс.
Вясельны бум: 39 гісторый кахання
Летні сезон аказаўся шчодрым на шчаслівыя вясельныя моманты. Усяго ў раёне зарэгістравана 39 шлюбаў, з іх 27 – у аддзеле ЗАГС райвыканкама. Урачыста, пад марш Мендэльсона, з абменам пярсцёнкамі і першым шлюбным пацалункам пад апладысменты гасцей, прайшлі 19 цырымоній.
25 пар узялі шлюб упершыню, а з улікам сельвыканкамаў такіх пар аказалася 35. Кожная з гэтых цырымоній – пачатак новай сямейнай гісторыі, даўжынёй у жыццё, падчас якой, і мы шчыра гэтага жадаем, будуць панаваць любоў і ўзаемаразуменне.
Узрост кахання: ад юнацтва да сталасці
Узрост тых, хто бярэ шлюб – гэта заўсёды цікавы зрэз грамадства. У сярэднім жаніхі ў гэтым сезоне былі крыху старэйшыя за нявест: сярэдні ўзрост мужчын склаў 31 год, жанчын – 29 гадоў.
Але статыстыка – гэта не толькі сярэднія значэнні. Былі і сапраўдныя рэкорды. Самаму юнаму жаніху споўнілася 17 гадоў, а самай юнай нявесце – усяго 15. З іншага боку, самы ўзроставы жаніх і самая сталая нявеста абмяняліся кольцамі ва ўзросце 69 і 68 гадоў адпаведна. Як заўважыў класік, “каханню ўсе ўзросты пакорныя”. І гэтыя лічбы – лепшае таму пацвярджэнне.
Лета, поўнае надзей
– 37 новых жыццяў і 39 новых сем’яў – гэта не проста радкі ў справаздачы. За кожнай лічбай – свая гісторыя: першыя ўсмешкі малых, слёзы шчасця нявест, хваляванне бацькоў, урачыстыя клятвы вернасці. Гэта вера ў тое, што кожная гісторыя будзе шчаслівай, а кожная сям’я – моцнай і дружнай.
Аддзел ЗАГС Петрыкаўскага райвыканкама віншуе ўсе сем’і, якія пабраліся шлюбам гэтым летам, і ўсе пары, якія замацавалі свой саюз. Жадаем вам кахання, здароўя, дабрабыту і доўгіх гадоў сумеснага жыцця! Няхай вашы дамы заўсёды будуць напоўнены цяплом, радасцю і дзіцячым смехам, – дадала ў завяршэнні размовы Ганна Іванаўна.
Галіна КАЗАК.
Фота аўтара.
Оставить комментарий