На працягу ўсяго часу супрацоўнікі ТЦСАН нязменна прыходзілі на дапамогу тым, хто апынуўся ў цяжкай жыццёвай сітуацыі, меў патрэбу ў доглядзе, увазе, добрым слове і проста чалавечым удзеле. Сёння ТЦСАН – гэта каманда прафесіяналаў, якая робіць усё магчымае, каб кожны чалавек адчуваў сябе не адзінокім, ведаў: побач – надзейнае плячо.
17 красавіка ў зале раённага Дома культуры гучалі словы, напоўненыя цяплом, пяшчотай, дабрынёй і шчырасцю.
Дырэктар Петрыкаўскага ТЦСАН Крысціна Аляксандрава з радасцю і гонарам сустракала гасцей.
Работнікаў Цэнтра павіншавалі намеснік старшыні Петрыкаўскага райвыканкама Аляксандра Янчанкава, старшыня камітэта па працы, занятасці і сацыяльнай абароне Гомельскага аблвыканкама На-дзея Цупа, начальнік упраўлення па працы, занятасці і сацыяльнай абароне Петрыкаўскага райвыканкама, намеснік старшыні раённага аддзялення партыі “Белая Русь” Мікалай Семяніцкі. Таксама Петрыкаўшчыну наведалі кіраўнікі Цэнтраў з суседніх раёнаў. З віншавальнай прамовай выступілі калегі-кіраўнікі “Капцэвіцкага сацыяльнага пансіяната “Палескія сосны” Мікалай Жыткавец і “Капаткевіцкага сацыяльнага пансіяната “Палессе” Людміла Гошка.
На ўрачыстасці прысутнічалі прадстаўнікі грамадскіх арганізацый: старшыня Петрыкаўскай РГА “Белая Русь” Святлана Блінец і намеснік старшыні РГА «Беларускі саюз жанчын» Вольга Усціновіч-Насека, якія павіншавалі прысутных са значнай падзеяй.
Кожны выступоўца з вялікай цеплынёй гаварыў пра юбіляраў, дзякаваў за самаадданую працу, увагу да кожнага чалавека, чуласць і высокі прафесіяналізм.
На ўрачыстасці з нагоды юбілейнай даты да віншаванняў далучылася Галіна Сухоцкая, першы кіраўнік Цэнтра, чалавек які стаяў у яго вытокаў. Неабходна адзначыць, што ўзначальвала Галіна Сухоцкая 23 гады. Пад яе кіраўніцтвам Цэнтр не толькі захоўвае найлепшыя традыцыі, але і ўпэўнена ідзе ў нагу з часам.
Кіраўніцтва і супрацоўнікі ўстановы былі ўдастоены дыпломамі, падзякамі і падарункамі. За кожным дасягненнем сферы сацыяльнай абароны насельніцтва стаяць людзі, якія садзейнічаюць прасоўванню яе наперад і заўсёды гатовы аказаць дапамогу сваім падапечным. Юбілей стаў нагодай для падвядзення вынікаў, уручэння ўзнагарод. На ўрачыстым мерапрыемстве ўшанавалі лепшых работнікаў, адзначыўшы іх прафесіяналізм, чуласць і неабыякавасць. Падзякай Петрыкаўскага ТЦСАН былі адзначаны спонсары: Паліна Бельская, дырэктар прадстаўніцтва Беларускага рэспубліканскага унітарнага страхавога прадпрыемства «Белдзяржстрах» па Петрыкаўскім раёне, Віктар Капыловіч, дырэктар таварыства з абмежаванай адказнасцю “Экагрынпрам”, Анатолій Піскун, дырэктар таварыства з абмежаванай адказнасцю “Аланторг”.
Азіраючыся на пройдзены 25-гадовы шлях, з падзякай і павагай кіраўнік Цэнтра Крысціна Аляксандрава назвала тых, хто рабіў першыя крокі на шляху станаўлення сістэмы сацыяльнай службы Петрыкаўскага раёна. Пад апладысменты залы ветэранам працы былі ўручаны кветкі і падарункі.
Ад усёй душы гучалі ў адрас работнікаў Цэнтра музычныя падарункі, падрыхтаваныя работнікамі культуры, а таксама наведвальнікамі аддзялення дзённага знаходжання для грамадзян “залатога” ўзросту.
Няхай ваша добрая справа працягваецца, а сэрцы тых, каму вы дапамагаеце, напаўняюцца цяплом і радасцю! Жадаем вам моцнага здароўя, невычэрпнай энергіі, новых поспехаў і далейшага развіцця!
Марыя ТАМКО,
фота аўтара.
Оставить комментарий