На чарговым прыёме грамадзян старшыня раённага выканаўчага камітэта дэталёва разабраў звароты жыхароў раёна. Спектр пытанняў – ад маштабнага капрамонту моста да кропкавых праблем добраўпарадкавання дарог у мікрараёне прыватнай забудовы.
Мост у Лучыцах: рамонт пачнецца ў чэрвені
Зямлякі з Лучыц на прыём да старшыні прыйшлі з шэрагам побытавых пытанняў. Адно з іх – стан дарогі Лучыцы-Хвойня і моста ў вёсцы Лучыцы. Праблема абвастраецца штогод у перыяды паводкі, калі шлях размываецца вадой. Раённымі ўладамі яшчэ ў 2025 годзе праведзена сур’ёзная работа, падрыхтавана праектна-каштарысная дакументацыя, на сённяшні дзень ідзе стадыя фінальнага ўзгаднення і ўжо ў чэрвені пачнецца капрамонт моста праз раку Пціч.
Што да дарогі, яе рамонт таксама пачнецца ў чэрвені. Як пазначыў дырэктар ДРБУ-112 Іван Хамец, запланавана павышэнне ўзроўню дарогі, устаноўка сцёкавых труб і іх умацаванне.
Слабада: юрыдычныя тонкасці пасля пажару
Жыхары арэнднага дома ў вёсцы Слабада прыйшлі з пытаннем аднаўлення жылля пасля пажару. Сітуацыя ўскладнена тым, што ў балансатрымальніка – ААТ “Пціч-Агра” – пакуль адсутнічаюць праваўстанаўліваючыя дакументы на аб’ект.
Рашэнне пытання бачыцца ў тым, каб у найкарацейшыя тэрміны завяршыць афармленне дакументаў. Правесці экспертызу, якая вызначыць маштаб пашкоджання і вызначыцца з тым, кім і ў якім памеры будзе адрамантаваны дом, і ці могуць жыхары прэтэндаваць на новыя плошчы.
Экалогія і камфорт: пад прыцэлам “Рэлакс”
Калектыўная скарга паступіла ад жыхароў дома №6 па вуліцы К. Маркса, што ў райцэнтры. Суседства з кафэ “Рэлакс” стала невыносным з-за дыму і іскраў ад кацельнай установы. Жыхары занепакоеныя вышынёй трубы і якасцю спальванага паліва.
Рашэнне прынята наступнае: кіраўнік раёна даручыў профільным службам правесці праверку абсталявання і зрабіць замеры паветра. Пытанне ўзята на жорсткі асабісты кантроль.
У цэнтры ўвагі – запыты вяскоўцаў
Старшыня раённага выканаўчага камітэта правёў у гэты дзень выязны прыём грамадзян і ў аграгарадку Навасёлкі. Асабістыя зносіны з кіраўніцтвам раёна дазваляюць жыхарам аператыўна вырашаць набалелыя пытанні прама на месцах.
Падчас прыёму да кіраўніка раёна звярнуўся жыхар вёскі Новыя Галоўчынцы. Заяўнік паведаміў пра ўцечку каналізацыі на сельскую дарогу паміж жылымі дамамі.
Кіраўніцтву водаканала дадзена даручэнне аператыўна выехаць на месца, правесці абследаванне ўчастку і ўхіліць усе выяўленыя няспраўнасці сістэмы.
Падводзячы вынікі сустрэчы, старшыня райвыканкама падкрэсліў:
– Прамы дыялог – гэта самы каштоўны інструмент у нашай працы. Сутнасць выязных прыёмаў якраз і заключаецца ў тым, каб з першых вуснаў даведвацца, чым жыве сяло, з якімі цяжкасцямі сутыкаюцца людзі. Зваротная сувязь дазваляе нам не проста аператыўна ўхіляць тэхнічныя непаладкі, але і глыбей разумець інтарэсы нашых грамадзян, выбудоўваючы працу на аснове іх рэальных патрэб.
Такая практыка даверных зносін застаецца залогам эфектыўнага развіцця раёна і аператыўнага вырашэння любых узнікаючых праблем.
Кожнае даручэнне па выніках прыёму зафіксавана спецыялістамі сектара па рабоце са зваротамі грамадзян, а іх выкананне знаходзіцца на кантролі.
Оставить комментарий