Сёння Петрыкаўскі раён прымае асаблівых гасцей!
Дэлегацыя Бранскай вобласці — удзельнікі Трэцяга форуму грамадзянскіх ініцыятыў «Ад ідэі да выніку» — пачала свой візіт з вельмі цёплай і душэўнай ноты.
Першай кропкай на маршруце стаў дзіцячы рэабілітацыйна-аздараўленчы цэнтр «Пціч».
І сустрэлі тут расіян з сапраўдным беларускім размахам і шчырасцю: з духмяным караваем і хлебам-соллю — як сімваламі бязмежнай павагі;
Звонкімі песнямі і запальнымі танцамі ў выкананні таленавітых удзельнікаў узорнага калектыву «Лявоніха».
З першых хвілін на петрыкаўскай зямлі нашы браты-расіяне адчулі ўсю шчодрасць, цеплыню і прыгажосць беларускай душы.
Дырэктар установы Аксана Кайтанава правяла змястоўную экскурсію для дэлегацыі з Бранскай вобласці, прэзентаваўшы аздараўленчы, вучэбна-выхаваўчы і матэрыяльна-тэхнічны патэнцыял ДРАЦ.
Госці высока ацанілі ўзровень арганізацыі дзіцячага адпачынку і атрымалі вычарпальныя адказы на ўсе пытанні.
Нас аб’ядноўваюць не проста суседскія адносіны, а векавыя сяброўскія повязі, трывалая грамадзянская актыўнасць і адзіны гістарычны лёс. Брэсцкая крэпасць, Хатынь — гэта нашы агульныя гераічныя і трагічныя кропкі памяці, якія нікому не дазволена перапісаць.
У сучасных умовах візіт сяброў з Браншчыны — гэта важны крок умацавання Саюзнай дзяржавы. Наша галоўнае супольнае жаданне — жыць у міры, згодзе і стваральнай працы, пазначыў старшыня раённага Савета дэпутатаў Віталій Пілер.
У фінале сустрэчы Аксана Кайтанава выступіла з ініцыятывай і запрасіла разгледзець магчымасць аздараўлення дзяцей з Бранскай вобласці на гасціннай Петрыкаўскай зямлі.
