Тэлефоннае махлярства набірае абароты, і колькасць падманутых з некалькіх адзінак вырасла да некалькіх дзясяткаў за месяц. У апошні час у сеткі ашуканцаў трапляюць пажылыя або даверлівыя людзі, якіх ставяць перад фактам пра неабходнасць дапамагчы роднаму чалавеку, што трапіў у бяду.
Званок паступае з незнаёмага нумара, як правіла, на хатні тэлефон, у буднія дні і ў дзённы час, калі члены сям’і на працы ці на вучобе. На тым канцы проваду паведамляюць, што блізкі чалавек патрапіў у бяду, тэрмінова патрэбны грошы, каб выратаваць яму жыццё ці зберагчы ад пакарання. Для вырашэння пытання, неабходны грошы, якія трэба прынесці і пакінуць у пэўным месцы або перадаць кур’ерам. Часу на роздум няма – зрабіць усё трэба хутка. Дадзеная тэма падымалася на старонках газеты не адзін раз, але, нягле-дзячы на шырокую трансляцыю праблемы, у сеткі махляроў трапляюць новыя ахвяры. Мы звярну-ліся да псіхолага Петрыкаўскага ТЦСАН Алены Слязь, каб пачуць меркаванне спецыяліста, як правільна рэагаваць на званкі тэлефонных ашуканцаў і нагадаць жыхарам раёна пра першачарговыя дзеянні ў дадзенай сітуацыі.
– Ёсць некалькі правілаў, якія дапамогуць абараніцца ад тэлефонных махляроў. Звярніце ўвагу на гаворку. Калі чалавек гаворыць гладка, без запінкі, тэкст падобны на завучаны ўрок, то, магчыма, ён падрыхтаваны загадзя. У рэальнасці людзі так не размаўляюць. Перад тым, як прыняць важнае рашэнне, вазьміце паўзу. Ашуканцы штучна ствараюць дэфіцыт часу. Яны будуць падганяць, ціснуць на тэрміновасць. Ім важна прымусіць вас дзейнічаць у моманце эмацыянальнага напружання, не даць магчымасць абдумаць і пераправерыць факты. Грошы трэба тэрмінова, зараз. Аферысты добра ведаюць: чалавек у стане стрэсу не вельмі ўважлівы да дэталяў і ўмоў. Не спяшайцеся – да любой сумнеўнай інфармацыі трэба ставіцца крытычна. Такую гутарку трэба адразу спыніць, патэлефанаваць родным, ад імя якіх дзейнічаюць невядомыя. Калі вашы блізкія не адказваюць, патэлефануйце іх знаёмым або на месца працы, у міліцыю і раскажыце што здарылася. Каб не згубіцца ад раптоўнага званка, зрабіце сабе памятку, у якой пералічыце, якую інфармацыю нельга паведамляць іншым, як сябе паводзіць у падобных сітуацыях. Часам перачытвайце напісанае, каб асвяжыць у памяці неабходныя ўстаноўкі.
Запісала
Святлана СОБАЛЕВА.
Оставить комментарий