Гэта ўжо не першы раз, калі дабрачынны фонд аказвае падтрымку ўстановам Петрыкаўшчыны. Так, у мінулым годзе ў Капаткевіцкім доме-інтэрнаце для састарэлых і інвалідаў мадэрнізаваны харчаблок: установе закуплены кацёл на 160 літраў і чатырохканфорачная электрапліта на агульную суму амаль адзінаццаць тысяч рублёў. У свой час значная дапамога была аказана ТЦСАН і Навасёлкаўскай бальніцы сястрынскага догляду.
“Міжнароднае дабрачыннае грамадскае аб’яднанне “Сафія” шмат гадоў займаецца дабрачыннасцю на тэрыторыі Беларусі, а таксама ў іншых краінах. Гуманітарная праграма МДГА спансіруецца Гуманітарнай службай. Дэвіз аб’яднання “Дапамагаць людзям, каб яны змаглі ў далейшым дапамагчы сабе самі”. Гуманітарная служба аказвае дапамогу тым, хто мае патрэбу ў многіх краінах свету”, – распавёў выканаўчы дырэктар МБГА “Сафія” Сяргей Зубовіч.
Зразумела, што перад запускам праекта Сяргей Станіслававіч прыязджаў азнаёміцца з сітуацыяй, выслухаць просьбы пра дапамогу, прыняць рашэнне, якое абсталяванне першачаргова неабходна набыць для Капцэвіцкага псіханеўралагічнага дома-інтэрната для састарэлых і інвалідаў.
Дырэктар Мікалай Жыткавец расказаў, што праблемай установы ўжо шмат гадоў была адсутнасць вялікай пральнай машыны і цэнтрыфугі для адціскання бялізны.
Рашэнне пытання не прымусіла сябе доўга чакаць. Ужо праз некалькі месяцаў названыя агрэгаты былі ўстаноўлены і зараз актыўна эксплуатуюцца.
Сяргей Зубовіч наведаў пральню і пацікавіўся, ці палепшылася жыццё персаналу і падапечных установы паля падарункаў. У адказ пачуў станоўчае: “Так!”
Па добрай традыцыі наклеіў сцікеры з брэндавым знакам “Сафіі” на прылады працы.
Таксама дому-інтэрнату былі ўручаны ложкі з матрацамі. Агульны кошт шчодрых падарункаў склаў 41 тысячу 482 беларускія рублі.
Гуманітарны супрацоўнік даў слушныя парады па выкарыстанні абсталявання і паклапаціўся, каб яно спраўлялася з неабходнымі аб’ёмамі працы.
Наталля ПЕТРУШЭНКА.
Фота аўтара.
Оставить комментарий