У першую нядзелю верасня ў Беларусі адзначаецца Дзень работнікаў нафтавай, газавай і паліўнай прамысловасці. Пра тое, як забяспечыць спажыўцоў цяплом якасна і тэрмінова, мы даведаліся ў працаўнікоў газавай службы.
Наталля Семечка працуе майстрам уліку і транспарціроўкі газа ўчастка па эксплуатацыі Петрыкаўскага раёна газазабеспячэння філіяла “Жыткавіцкае вытворчае ўпраўленне” РВУП “Гомельаблгаз”. Галоўная задача спецыяліста арганізаваць своечасовую дастаўку звадкаванага балоннага газу да насельніцтва. Транспарціроўку ажыццяўляюць дзве машыны, які дастаўляюць паліва да домаўладанняў 7012-ці спажыўцоў.
– Вядома, колькасць кліентаў, якія карыстаюцца балонным газам, змяншаецца. Людзі набываюць электрычныя пліты, на вуліцы населеных пунктаў вядзецца цэнтралізаванае газазабеспячэнне. Адпаведна з кожным годам расце колькасць карыстальнікаў прыродным газам, зараз іх – 6495. Канешне, мы прапануем блакітнае паліва не толькі фізічным асобам. Сёлета самым буйным спажыўцом газа ў вобласці стала газаразмеркавальная сістэма Петрыкаўскага рудаўпраўлення ААТ “Беларуськалій”, якая спажывае ад дзевяцісот да мільёна кубічным метраў газа на месяц. Сярод будучых нашых абанентаў – новы фізкультурна-аздараўленчы комплекс, які будзе пабудаваны ў паўночнай частцы горада і новае памяшканне райаддзела ўнутраных спраў.
Акрамя гэтага, мы пачалі прапаноўваць насельніцтву малалітражныя балоны, што знайшлі попыт сярод гаспадароў дачных сядзіб. Дастаўка газа ажыццяўляецца згодна з зацверджаным графікам райвыканкама ў вызначаныя дні, – падзялілася лічбамі Наталля Іванаўна.
Да вышэйадзначанага можна дадаць, што спецыяліст займаецца яшчэ і пытаннямі запазычанасці кліентаў. Калі прызваць да адказнасці гаспадароў не атрымліваецца, спагнанне ажыццяўляецца праз суд. Зараз у судовыя органы накіраваны дакументы па 9-ці злосным неплацельшчыкам.
Наталля Іванаўна працуе ў газавай службе з 2017-га года, партрэт жанчыны сёлета на Дошцы гонару лепшых працаўнікоў Жыткавіцкага вытворчага ўпраўлення. Па словах суразмоўцы, калектыў прыняў яе цудоўна: “Тут кожны на сваім месцы і ўсе добра ведаюць сваю справу. Гэта не прыгожыя словы: кампетэнтнасць, прафесіяналізм і адказнасць – неабходныя якасці нашых супрацоўнікаў, якія павінны тэрмінова, якасна і бяспечна выконваць свае абавязкі”, – ахарактарызавала калег Наталля Семечка.
Мікалай Алейнік працуе майстрам унутрыдамавой газавай службы Петрыкаўскага раёна газазабеспячэння філіяла “Жыткавіцкае вытворчае ўпраўленне” РВУП “Гомельаблгаз” з 2012 года.
– Мы абслугоўваем газавыя пліты, катлы як айчыннай, так і замежнай вытворчасці, ажыццяўляем дыягностыку па вызначэнні тэхнічнага стану па заканчэнні тэрміна службы газавага абсталявання і, вядома, сярод нашых задач – выкананне пуску газу, пасля таго як у домаўладанне праведзена газазабеспячэнне. Сярод абанентаў прыватнага жыллёвага фонду налічваецца 1792 спажыўца і гэта лічба год да году расце, – заўважыў Мікалай Мікалаевіч.
Мужчына родам з Петрыкава, кажа, што ў школе не задумваўся пра тое, што лёс яго будзе звязаны з галіной газазабеспячэння, але склалася менавіта так і прафесія яго зацягнула, ды так, што зараз ён сярод лепшых на галіновай Дошцы гонару “Гомельаблгаз”: “Канешне, справа газавіка патрабуе пільнасці, таму наша праца пастаянна кантралюецца для забеспячэння належнай бяспекі. З іншага боку адзначу, што сістэма нашай работы выбудоўвалася дзесяцігоддзямі, многімі пакаленнямі спецыялістаў, што дазваляе зараз ажыццяўляць забеспячэнне газам і выкананне іншых паслуг якасна і тэрмінова”.
Адказваючы на пытанне, што газавікі жадаюць калегам у прафесійнае свята, суразмоўцы адзначылі: “Вядома, жадаем адзін аднаму моцнага здароўя, спакою, дабрабыту ў сем’ях. Жадаем, каб і надалей стасункі з кліентамі заўсёды былі добразычлівымі, усё ж мы, у першую чаргу, працуем для людзей”.
Арцём ГУСЕЎ.
Фота аўтара.
Оставить комментарий