У мінулую суботу чарговы райцэнтр Гомельшчыны святкаваў 80-ю гадавіну вызвалення ад нямецка-фашысцкіх захопнікаў. На мітынг у Лоеве сабраліся тысячы ўдзячных нашчадкаў з усёй вобласці. Удзел у мерапрыемстве прыняла і дэлегацыя Петрыкаўскага раёна.
Ля Манумента Славы вядучыя згадалі гістарычныя факты, як увосень 1943 года Лоеў быў у эпіцэнтры баявых падзей. Гітлер заяўляў, што хутчэй Днепр пацячэ ў адваротны бок, чым нямецкае войска пакіне гэтыя месцы. Але яго перакананне ўшчэнт было разбіта мужнасцю і гераізмам савецкіх салдат.
– Па ўспамінах відавочцаў, восенню 1943 года Днепр у раёне Лоева быў бурым ад крыві. Немагчыма ўявіць, як можна было фарсіраваць гэтую шырокую раку пад магутным абстрэлам ворага, а потым пад кананаду караскацца па абрыве, урывацца ў акопы і біцца да смерці. Тут склалі галовы больш за 12 тысяч савецкіх салдат і афіцэраў практычна ўсіх народаў СССР. Мы зробім усё, каб нашы дзеці і ўнукі захоўвалі гэтую памяць як залог адзінства нацыі і мірнай будучыні дзяржавы, – падкрэсліў старшыня аблвыканкама Іван Крупко. Менавіта для гэтага, заўважыў губернатар, па ўсёй вобласці штогод ствараюцца і рэканструюцца помнікі.
У час святкавання 80-годдзя вызвалення ад нямецка-фашысцкіх захопнікаў першага населенага пункта краіны – гарадскога пасёлка Камарына – быў дадзены старт акцыі “На шляху да Перамогі”. Вялікі Сцяг Перамогі як сімвал пераемнасці пакаленняў і святасці памяці перадаецца з аднаго населенага пункта ў іншы па храналогіі іх вызвалення. Лоеў атрымаў сцяг ад Добруша, які быў вызвалены 10 кастрычніка, а перадаў яго ў гэты дзень Рэчыцы.
У працяг урачыстасці ўдзельнікі мітынгу ўшанавалі памяць герояў-вызваліцеляў хвілінай маўчання і ўсклалі кветкі і вянкі да брацкага пахавання.
Святочныя мерапрыемствы ў Лоеве з нагоды 80-годдзя вызвалення раёна ад нямецка-фашысцкіх захопнікаў і 518-ага дня нараджэння гарпасёлка прадоўжыла свята “Мы разам!”, падрыхтаванае Федэрацыяй прафсаюзаў Беларусі. З галоўнай сцэны жыхароў раёна павіншаваў старшыня аблвыканкама Іван Крупко. Свае віншаванні лоеўчанам перадалі таксама “Патрыёты Беларусі”.
На Гомельшчыне свята памятаюць пра герояў мінулай вайны, а помнікі і абеліскі на вуліцах, у парках, скверах будуць заўсёды нагадваць аб ратным подзвігу воінаў-вызваліцеляў. У гэтым шэрагу бітва за Лоеў – адзін з яркіх і крывавых узораў самаахвярнага супрацьстаяння савецкай арміі і народных мсціўцаў у нялёгкім адзінаборстве з нямецка-фашысцкімі захопнікамі.
Галіна КАЗАК, фота аўтара.
Оставить комментарий