Сёлетнія спартыўныя дасягненні Юліі Ходзька ўражваюць. 13-гадовая дзяўчынка з дазволу трэнера вылучае мне некалькі хвілін свайго часу, каб расказаць пра нядаўнія спаборніцтвы, першыя крокі ў вяслярскім спорце і свой лад жыцця.
З глыбокага маленства ёй падабалася вада. Калі Юлія была яшчэ маленькай, бацька прыводзіў дзяўчынку на затоку Бычок і яна назірала за трэніроўкамі весляроў. З гэтага часу і пачала марыць пра веславанне.
– Я займаюся ў ДЮСШ Петрыкаўскага раёна трэці год. Спачатку трэніраваў мяне Мікалай Анатольевіч Бобрус: з першых заняткаў я захапілася – было цікава, весела, хоць, разам з тым, і складана. Зараз мяне трэніруе Максім Сяргеевіч Брыкет – пачынае размову юная спартсменка.
У мінулым годзе Юлія ўпершыню трапіла на спаборніцтвы, а на сёлетніх турнірах ужо паказала нядрэнныя вынікі. У верасні праходзілі адкрытыя спаборніцтвы на прызы Заслужанага майстра спорту СССР, заслужанага трэнера СССР Леаніда Дзеравянкі, дзе наша зямлячка паказала на мазырскай вадзе трэці вынік у байдарцы-адзіночцы на дыстанцыях 200 і 500 метраў і святкавала перамогу на паўкіламетровай дыстанцыі ў саставе байдаркі-чацвёркі разам з мазырскімі дзяўчынкамі.
На рэспубліканскіх спаборніцтвах сярод спецыялізаваных навучальна-спартыўных устаноў прафсаюзаў Юлія таксама была трэцяй на адрэзку ў 500 метраў, заняла другое месца ў складзе “мікса” “дзяўчынка-хлопчык” і стала пераможцай у экіпажы байдаркі-чацвёркі.
Па словах дзяўчынкі, часам, пазіраючы на аднагодак, якія маюць шмат вольнага часу, хочацца застацца дома. Але пераадольваючы сябе Юлія Ходзька крочыць на трэніроўку са словамі “Так трэба”. “Адпачыць ёсць калі: і на выхадных, і ўвечары, затое загартоўваецца характар. Ведаеце, да веславання я нават заняткі па фізічнай культуры і здароўі не надта любіла. А зараз другая справа! Наведваю з радасцю, ды і нарматывы, вядома, здаю куды лепей. У роднай другой гарадской школе я вучуся нармальна, таму не трэба думаць, што спорт неяк перашкаджае”, – адзначыла спартсменка.
Па словах трэнера Максіма Брыкета, Юлія – актыўная, эмацыйная і вельмі перспектыўная спартсменка. Зараз ужо не адзін спецыяліст вучылішча алімпійскага рэзерву зацікаўлены ў яе далейшай падрыхтоўцы на прафесійным узроўні.
А мы жадаем юнай ураджэнцы Петрыкава далейшых поспехаў! Будзем абавязкова сачыць за яе новымі стартамі і падзяляць радасць будучых перамог. Хуткай вады табе, Юлія!
Арцём ГУСЕЎ, фота аўтара.
Оставить комментарий