Днямі былі падведзены вынікі заключнага этапу рэспубліканскай алімпіяды па навучальных прадметах сярод вучняў устаноў агульнай сярэдняй адукацыі.
Гімназісты горада Петрыкава паказалі сябе на самым высокім узроўні, заваяваўшы дыпломы І, ІІ і ІІІ ступеняў. Такая колькасць дыпломаў за адзін сезон – выключны выпадак.
Сваімі ўражаннямі ад алімпіяды падзялілася вучаніца 11 класа Ганна Ганчар, якая атрымала дыплом І ступені па грамадазнаўстве. Дарэчы, гэта ўжо трэцяя запар перамога дзяўчыны.
“Алімпіяда была арганізавана на самым высокім узроўні. Не было лішняй мітусні, што паляпшала яе ход. У першым этапе я справілася з заданнямі за тры гадзіны, у другім – за гадзіну. Ці хвалявалася? Зразумела, але я была ўпэўнена ў сваіх сілах, гэтаму папярэднічала мэтанакіраваная падрыхтоўка на працягу некалькіх гадоў. Канкурэнцыя адчувалася сур’ёзная. Кожны, як і я, жадаў перамагчы. Дзякуючы алімпіядзе, я ўжо акрэсліла пэўны вобраз сваёй будучыні”, – агучыла Ганна.
Кірыл Адамоўскі, які атрымаў дыплом ІІ ступені па гісторыі, наступным чынам ахарактарызаваў свой удзел у алімпіядзе: “Шчыра кажучы, я не задаволены вынікам, нацэльваўся на першае месца. Мне здаецца, не ўсе заданні адносіліся да гісторыі, хутчэй, да грамадазнаўства. І гэта паўплывала на канчатковы вынік”.
Сур’ёзна гісторыяй Кірыл займаецца з 5 класа. Па яго словах, прадмет – не толькі навука. “Гэта яшчэ і спосаб зразумець наш свет і змяніць яго ў лепшы бок”, – агучыў вучань.
“Такія дзеці нараджаюцца раз у некалькі дзесяцігоддзяў, – адзначыла настаўніца гісторыі і грамадазнаўства Галіна Туравец. – Ганна больш разважлівая вучаніца, а вось з Кірылам, быў час, даводзілася і спрачацца ў нейкіх пытаннях. Дзецьмі ганаруся.
Разам з вучнямі пры пад-рыхтоўцы мы карыстаемся спецыялізаванай літаратурай, праглядваем дакументальныя фільмы, разбіраем заданні мінулых конкурсаў. Мне асабліва прыемна, што Ганна і Кірыл практычна ўвесь свой вольны час прысвячаюць вывучэнню прадметаў. Зразумела, што без пільнай падрыхтоўкі такіх перамог нельга дабіцца. Вучні атрымліваюць не толькі падтрымку з боку кіраўніцтва гімназіі, а і раёна: старшыня раённага выканаўчага камітэта Аляксандр Кохан пераможцаў абласной і рэспубліканскай алімпіяд узнагароджвае ад райвыканкама грашовай прэміяй, вобласці – штогод арганізуецца навагодні бал для таленавітай моладзі, у ліку якіх і нашы дзеці. А яшчэ Ганна Ганчар правяла тыдзень у Паўночнай Асеціі. Паездка стала магчымай дзякуючы праграме Расійскага супрацоўніцтва “Добры дзень, Расія!” пры падтрымцы Рускага дома ў Гомелі”.
Дыплом ІІІ ступені па рускай мове для вучаніцы 9 класа Аляксандры Булавы і яе настаўніцы Людмілы Мчэдлавай стаў сапраўднай узнагародай за складаны працяглы час падрыхтоўкі.
“У момант агучвання вынікаў усё чакала, калі назавуць маё імя. Я прыклала ўсе намаганні, каб атрымаць рэспубліканскі дыплом, хай і не І ступені, – сказала Аляксандра. – Думаю, гэта не апошняя мая алімпіяда. Я паспрабавала свае сілы і ведаю, чаго магу ў выніку дасягнуць. Задумваюся пра сваю будучыню, мне падаецца, што яна будзе звязана з філалогіяй”.
Мы віншуем вучняў і іх педагогаў з такой высокай адзнакай сваёй работы над вывучэннем прадметаў і жадаем не спыняцца на дасягнутым!
Наталля ПЕТРУШЭНКА.
Фота аўтара.
Оставить комментарий